Faafetaia e Faleomavaega le valaaulia a Tuilaepa mo Bainimarama

Ua faafetaia e le taitaifono o le soa komiti i mataupu tau Asia ma le Pasefika ma le siosiomaga o le lalolagi, le tofa Faleomavaega Eni Hunkin, le valaau faaaloalo a le Palemia o le Malo o Samoa, susuga Tuilaepa L Sailele Malielegaoi i le taitai poo le Palemia o Fiti o Commodore Frank Bainimarama, mo se asiasiga atu i lona atunuu.
Faaalia e Faleomavaega lona taliaina o lea valaau faaaloalo a Tuilaepa mo le Palemia le tumau o Fiti ma o se ata manino lea o taumafaiga o loo manaomia foi e isi Malo aemaise le lio o atunuu o le Pasefika e faatino e isi taitai o le Pasefika mo Fiti.
O se laasaga foi e maua ai se fofo o faafitauli o tulai mai i lea atunuu tuaoi ma ia aua nei faia nisi aiaiga ma faasalaga e palasi ai le avega mamafa i tumuai o tagata lautele o Fiti.
Saunoa Faleomavaega ua taua e Tuilaepa se tasi o vaega taua i aganuu a Fiti ma Samoa o le faamatai aua e iai foi alii sili o Fiti e laina tutusa ma le tulaga o matai taua o Samoa.
O se lipoti talu ai nei na faaalia ai e le Palemia o Samoa o se avanoa lelei lea mo Bainimarama e malaga asiasi atu ai i lona atunuu ma silasila i tu ma aga ma faiga faamatai pe maua ai se isi fofo e fesoasoani i ana fuafuaga mo le sailia o se filemu o upufai o lona atunuu.
Faaalia e Tuilaepa i sana fautuaga e le atoatoa pea pulega faatemokarasi, peitai a o lei ausia se tulaga i ni pulega lelei, o faiga faatemokarasi e sili atu ona manino ma malamalama ma maua ai le filemu o tagata.
O Bainimarama e iai ona aiga ma sootaga i Samoa ma o se isi lea vaega taua o sana aisiasiga i Samoa o le a mafai ona toe faamautu ai ona tupuaga ma sootaga.
E lei maua mai se faamatalaga po ua maua e Bainimarama se valaaulia tusitusia mai le Palemia o Samoa, ae afai ua ave se valaau faaaloalo, e le taumate o le a talia fiafia e lea taitai ma malaga loa i Samoa sei tali le faaaloalo.