O se faalapotopotoga ua aupito toatele ona tagata ua avatu i Niu Sila i avanoa faigaluega faavaitaimi ua faafetaia le sainigalima o le vaiaso na tea nei i le va o Ausetalia ma Samoa mo avanoa faigaluega faapea i lea foi atunuu.
Faaalia e le Afioga Tuatagaloa Joe Annandale, o le Faalapotopotoga lea ua ta‘ua o Avanoa Faigaluega Faavaitaimi a Falealili, e matuā tele avanoa faigaluega ma tele faamanuiaga o le a maua e tagata Samoa mai i nei avanoa fou ua faamautu mai. “O le maketi i Ausetalia e matuā telē atu nai i lo Niu Sila, o lona uiga e toatele atu tagata o le a moomia ia latou galuega e tauina le fua o fualaau aina,” o se saunoaga lea a Tuatagaloa.
Ua tolu nei tausaga o faatino e Tuatagaloa ma ni tagata o lona itumalo galuega e saili ai avanoa o tagata faigaluega mai Falealili mo Niu Sila, ma o ni faigamalaga ua manino ai le faamanuiaina o le Itumalo.
O le itumalo lava lea e aupito toatele ona tagata ua mafai ona malaga i Niu Sila talu ona amata mai lenei polokalame ua agai atu ai le toatele i Niu Sila mo le faatinoga.
O le Malo lava e ala i le Matagaluega a le Palemia ma le Kapeneta e vaavaaia le tulaga o iai galuega nei o loo agai atu ai le toatele i tausaga taitasi i Niu Sila.
E lē o mafai e Niu Sila ona ave uma tagata o loo mafai ona agai atu i Niu Sila mo nei avanoa faigaluega faavaitaimi.
“O le matuā toatele lava o le numera o tagata Falealili o loo moomia ni galuega faapea, ae e auai lava i le faasologa ina ia faatofutofusia uma tagata i avanoa o loo maua mai,” o se faamatalaga lea a Tuatagaloa.
Faaalia e lea tamalii o isi taimi e taufao ai e tagata avanoa nei mai i Niu Sila ma e oo lava i tulaga ua agai mai lava i le latou faalapotopotoga ma seleni e totogi ai le iai o aiga i Niu Sila i le amataga o le malaga atu ma galulue ai i ia avanoa, ma o le mafuaaga lea o le manatu o Tuatagaloa, o le tatala mai e Ausetalia o ona faitotoa mo nei avanoa atonu o le a mafai ai loa ona agai le toatele o tagata o lona itumalo o loo tau saili lava avanoa faigaluega nei.
O le faafetai foi lea a le alii Palemia, le Susuga Tuilaepa Lupesoliai Sailele Malielegaoi i le sainigalima ma le alii o Richard Marles o le Ofisa o Ausetalia e faamautu ai nei avanoa faigaluega.
O Samoa se tasi o atunuu ua ave i ai nei avanoa e le Malo o Ausetalia i le mae‘a ai o tausaga e tolu talu ona amatamea Niu Sila e faatino nei fesoasoani mo atumotu o le Pasefika.
Mo Ausetalia o le avanoa muamua na tuuina mai i atumotu o le faatutu lea o ni matata eseese a lea Malo i nisi o atunuu filifilia e aofia ai ma Samoa, ma o tusipasi e maua mai i ia aoga o le a talia e Ausetalia pe a saili galuega atu i ai tagata o le Pasefika. O lea la ua aofia amata atu i le tausaga fou, i avanoa nei o galuega faavaitaimi.
Ua foi mai Tuatagaloa i sana faigamalaga e sailiili ai avanoa faigaluega i Ausetalia mo tagata o lona itumalo.
O lona finagalo ia saili foi le latou faalapotopotoga, ae o lea la ua faamautu mai e Malo e lua avanoa nei, ua faatali nei lea tamalii i tuutuuga ma le faagasologa o nei avanoa se‘i talosaga i ai.
E tusa ma le to‘a 120 lava tagata faigaluega faavaitaimi o loo tau fualaau i Niu Sila i le taimi lenei. O lea foi e sauni le isi to‘a 25 e malaga i Niu Sila e faaopoopo i le numera ua i Niu Sila i le taimi lenei, ma o le faaiuga o le masina o Ianuari lea ua fuafua e malaga atu ai loa i latou nei.
