(Lagolago malosi le District Health Board, polokalame a le Healthy Village Action Zone – HVAZ)
O le 5 nei o tausaga talu ona faagasolo galuega faapaaga a le Procare Health Ltd, Auckland District Health Board ma Ekalesia Pasefika e aofia ai Samoa, Tonga, Niue, Cook Islands Tokelau ma Tuvalu i Polokalame faalesoifua maloloina. E 42 Ekalesia o loo iai i lea Polokalame e ta‘ua o le Healthy Village Action Zone [HVAZ]. O le tasi lenei o vaega o auaunaga a le HVAZ, o le mataituina lea o auala e lagolagoina ai ana Ekalesia i le taumafa soifua maloloina. O le tolu la nei o tausaga o faagasolo ana tufaga faailoga e lautogia ai Ekalesia ua ausiaina taiala o le taumafa paleni/soifua maloloina.
E 15 taiala e aofia ai:
1. Tuu i ai ni fualaau‘aina felesi pe mai le aisa e faafelanulanuai ai le kuka, manaia ni sanuisi ua iai ma ni salati fualaau‘aina
2. A tausami le pisupo, faavevela muamua le apa ma tia‘i ese le ga‘o
3. A tausami se apai‘a faatau, filifili apa eseese o loo iai vai puna poo le brine ua faamātū
4. Tipi ese ma tia‘i le mea ga‘oa mai aano o manufasi a o lei kukaina
5. Tipi ma tia‘i ese le pa‘u o le moa a o lei kukaina, pe a o lei taumafaina
6. Sasaa sina ipuvai i le peepee e sui ai pe faatau le apa peepee ua faaitiitia le lololo
7. Tao manufasi ma fualaau ae aua le falaiina. A manaomia se ga‘o i le kuka, faaaogā le Canola, e sili atu lena toe taugofie
8. Faalaitiiti le masima i totonu o kuka, aua ne‘i tuuina le fagu masima i luga o le laulau pe a fai le taumafataga
9. E sili atu le falaoa enaena ma e fesoasoani le fibre
10. Faaaogā fualaau‘aina mata mo vai‘aiga (dessert). Tipi faalaiti ina ia faigofie lona taumafaina
11. Faaaogā le vai paipa nai lo faguinu poo isi vai suamalie
12. Filifili e faaaogā le susu e itiiti lona lololo (lanu moana vaivai, lanu meamata, lanu samasama) i iputi, i taumafa o le malutaeao ma kuka
13. O keke, masi keke, lole, chips, taumafa e tele ai le falaoamata ma taumafa ua falai – e lē o ni tuamafa mo aso fai soo ma e tatau lava ona taumafa vāvā ma faalaitiiti le tausami i ai
14. Taiala mo le saogalemu o taumafa i taimi o gasesega – Faamamā, faavela, ufiufi, faamālūlū – e tatau ona utagia pe a tapenaina mea tausami
15. Saunia se kalena o lisi o kuka mo le vaiaso e fesoasoani i le faaitiitia o le faaaluina o tupe i taumafa ma fesoasoani i le tausisia o le taumafa paleni/soifua maloloina
E tolu vaega ua vaevaeina i ai: Apamemea [3 ni taiala ua filifilia e le Ekalesia e galulue i ai], Siliva [7 ni taiala ua latou filifili e galulue i ai] ma le Auro [taiala uma e 15].
E 9 Ekalesia sa faamanuiaina i le tulaga o le Auro, 4 Siliva ae 3 Apamemea i le tufaga faailoga a le HVAZ sa faataunuuina i le Aso Tofi, 20 o Iuni na se‘i mavae atu nei. Ua 23 ai nei Ekalesia ua o latou ausiaina le tulaga o le Auro. O lea faamoemoe sa faataunuuina i le hall a le Katoliko Onehunga [Lady of the Assumption].
