Ua atoa le tolu o masina talu ona vaaia mafatiaga o nisi o nuu o le atu Filipaina ona o le afā fulifaō o Haiyan i le masina o Novema o le tausaga na tea nei. Talu mai lea taimi e lē o malolo lava le faalapotopotoga poo le sosaiete o tagatānuu o Filipaina i Samoa i sailigatupe ua faatino auā lava le faaauau o le fesoasoani e ofo atu i lea atunuu i galuega toe faaleleia o loo taumafai ai nei mo ia tagata.
O le faamatalaga a le tamaitai o Elita Garin Aloaina, lea o loo faauluulu i ai le Sosaiete o tagata Filipaina i Samoa, o loo tuai lava le toe tulai mai o vaega o le atu Filipaina na faaleagaina i se lelei atoatoa, ma e 150 fale ua mae‘a ona fausia i fesoasoani o loo faaauau ona lafo atu i faalapotopotoga faapea atoa ai atunuu ua agalelei atu i lo latou atunuu ma o le faamoemoe ia faaauau ona ave pea foai mo le faaauau ai foi o galuega toe faalelei.
O le faaiuga o le vaiaso na tauaao atu ai se tasi o le tele o fesoasoani ma sailigatupe ua faia i Samoa nei mo lea faamoemoe. O le kamupani o telefoni feaveai o le BlueSky lea na faapea ona aoina foai mai i le mamalu o le atunuu e fai telefoni ai i lea kamupani.
Sa faalauiloa i le au fai telefoni BlueSky le numera e vili ma ofo i ai le fesoasoani mo tagata Filipaina ma o le faaiuga lea o lea sailigatupe e $5,000 (tala Samoa) lea na maua ai.
O le alii pule o le BlueSky Samoa, o Toleafoa Douglas Creevey na faafetaia le fesoasoani a latou paaga fai telefoni feaveai ua mafai ai ona aoina lea tupe ma o ia sa tauaao atu lenei fesoasoani ia Aloaina ma sui o le Sosaiete o Tagata Filipaina i Samoa.
O le faamoemoe o lenei tupe o le a alu sa‘o lava i le Koluse Mumu a Filipaina auā le faasoaina mo a latou galuega toe faalelei o loo faagasolo nei. E $30,000 (tala Amerika) na foai atu e le Malo o Samoa mo le Koluse Mumu foi a le malo o Filipaina auā galuega i le toe fausia o nofoaga ua faaleagaina.
E lē gata i lea o faalapotopotoga e pei o le Ekalesia Faapotopotoga Kerisiano Samoa ma suegatupe lava na faia i Samoa e lenei Sosaiete na maua ai seleni ua mae‘a ona lafo i lea atunuu auā le fesoasoani ia i latou ua puapuagatia ona o lea faalavelave faanatura matautia.
O le faafetai foi lea a le Sosaiete a tagata Filipaina i Samoa ona o le faaauau ona manatua o puapuaga o lea atunuu e tagata o Samoa.