“Faafetai Sydney i lou Aao Agalelei”

Mafutaga a Alo & Fanau a Vaimoso i Sini Ausetalia ma le Aumalaga mai Samoa, Afioga i le Sea Rev Falo & Maria Valomu’a ma le Tausi Matagaluega Rev Auro & Fa’asu Teve (ogatotonu)
Mafutaga a Alo & Fanau a Vaimoso i Sini Ausetalia ma le Aumalaga mai Samoa, Afioga i le Sea Rev Falo & Maria Valomu’a ma le Tausi Matagaluega Rev Auro & Fa’asu Teve (ogatotonu)

Ua loa ona faafofoga Samoa i luga o alalelo faasalalau i Sydney, i le faatalauula a le susuga i le Tausi Matagaluega ma le Ekalesia Metotisi i Vaimoso, lo latou faamoemoe e ala i la latou Tusigaigoa saili tupe, ona o le Mauga o le Atua i le afioaga lava.

O lea tofa ma se moe sa taulamua ai le Mafutaga a Alo ma Fanau a Vaimoso i Sydney, o loo faauluulu lea i le susuga i le Taitaifono le afioga ia Faalavaau Paulo Penese ma le Laulau a le Mafutaga, ae maise ai o le lagolagosua a so latou paolo i le Atua, le afioga i le Alii Sea ia Rev Falo Vaomu’a ma le faletua ia Maria.

Na malaga mai le atunuu mo lea faamoemoe le susuga i le Tausi Matagaluega ia Rev Auro Teve ma le Faletua ia Faimafili, le Failautusi le tofa i le Igoa Matua ia Manuleleua Ioane, le tofa ia Aulavemai Asiata Valasi Togamaga Tafito Selesele, le susuga ia Aiono Faaaliga Tapuai ma Lupefotu June Leleimalefaga.

O le aso 8 o Setema 2018 na faataunuuina ai lea faamoemoe i le Hall a le PCYC i Shalvey. Na amataina lava i se Sauniga lotu puupuu, ina ua taunuu le Aufaigaluega i Fata Faitaulaga eseese ma le valaaulia, i le paia o Aiga ma le Faafaleupoluga ae tainane o Samoa potopoto.

 Foliga fiafia o le Mafutaga a Alo & Fanau a Vaimoso ina ua manuia le Faamoemoe
Foliga fiafia o le Mafutaga a Alo & Fanau a Vaimoso ina ua manuia le Faamoemoe

I aga masani o aso faapenei, na vaaia ai le tafe atu o le agalelei o Samoa alolofa e ala siva ma ipu a le Mafutaga ma le faigamalaga mai Samoa, ae o le sili ona o le alofa faitino o le Faasinoti a Sydney ma le maualuga o le valaaulia.

E lei mama lava foi i le Mafutaga le afifio ma maliu atu o le paia o le atunuu, ae tainane o paaga ma uo mamae a le afioaga, auā ua le gata i la latou tali mai auā le fofoga taumafa o le aso, ae faapea foi le taimi o ana teuga ma faaaloaloga i le Malo ma le Toga paia, na fai meaalofa ai e tali atu ai i le alofa ma le agagalelei faatino o le atunuu lea na latou sapaia ai le tinoitupe e $183,000.00 Tala Ausetalia.

O le fofoga lava o le aso na feagai lea ma le tofa ia Tiufea Atonio Une, ae o le tofa ia Aulavemai Asiata Valasi Togamaga Tafito, na fetalai e fai ma fofoga tau molimoli auā le afio o le Tama-ale-Fale ma le Usoalii, le Matua ia Patauave ma i laua Igoa Matua ia Une ma Manuleleua ma o laua Aiga, ae maise o le faautautaga ia Faleata. O se upu e momoli ai le loto ua tumu i le malie ona o le maualuga o le alofa, ae tainane foi o le faasoaina o a latou faaaloaloga auā le Aufaigaluega a le Atua ma Samoa alolofa. O le Aso Faraile 21 o Setema na toe taliu ai mo Samoa le susuga i le Tausi Matagaluega ia Rev. Auro Teve ma le Faletua faapea le faigamalaga, ma le loto ua taumasuasua i le fiafia, ona o le tele o le alofagia o lo latou faamoemoe.

O i latou (matafale) sa faafoeina le faamoemoe o le afioaga auā le Ekalesia Metotisi i Sydney Ausetalia; O le afioga i le Alii Sea ma le Faletua ia Rev Falo & Maria Vaomu’a, Faalavaau Paulo Penese (taitaifono) Asiata Lagolago Selesele (sui taitaifono) Tiufea Une Fuimaono Taala, Tuliatu & Lesina, Tiatia Iosua & Penina Si’ufaga Iosefa Vili (teutupe), Suluga Lameta (failautusi), Sa Fesuluai, Loleta Tiederman ma Toomata Europa Matai’a Visesio.