Faafetai Samoa i fesoasoani a le Iuni a Europa

O le alii Palemia o Samoa na taitaia le faafetai na momoli i le Iuni a Europa i le fono tele na talimalo ai Samoa i le faamautu ai o le fesoasoani mo le tausaga e 2014-2020 auā atunuu laiti o le Pasefika a lea faalapotopotoga.
O le fono lona 11 lenei ua usuia i Samoa auā le talanoaina o auala ua faatino ai e atumotu e 14 o le itulagi fesoasoani faaauau mai le Iuni a Europa ma o se suiga o lenei fonotaga ua unai ai le mulimulitai i suiga ua tuuina mai i auala ua ave i ai le faamuamua o atinae ua faatupe i lalo o lenei fesoasoani tele e ta‘ua i le faa-Peretania o le EDF.
Faaalia e le alii Palemia, o le auai mai o le Komesina o le Ofisa o le EU i lenei fonotaga ua faamausali ai le manaoga o malo o Europa ina ia malosi lana lagolago e tuu mai i lenei vaega o malo laiti o Aferika le Karepeane ma le Pasefika le ACP.
O le taulai lea ua vaaia i le agai mai a Europa i le Pasefika, o le taumafai ina ia faaopoopo le lagolago i le puipuiga o lenei itulagi mai le mau luitau o loo aafia ai pea ona tamaoaiga ma le atinae o ona tagata.
O le fono lenei na ta‘ua e le Susuga Tuilaepa Lupesoliai Sailele Malielegaoi ua mafai ai foi ona momoli sa‘o lana faafetai e fai ai ma sui o le Malo ma tagata o Samoa i lea faalapotopotoga i fesoasoani ua tuu mai mo Samoa lava ia e ala i lenei fesootaiga.
O le fesoasoani a le EU na ta‘ua e le alii Palemia ua mafai ai nei ona maua le suavai ua faamamā i Samoa, ua faaleleia ai auala aemaise o le toe fausia ai o faleaoga i nuu i tua ma falemai i itumalo o le atunuu, ua mafai ai foi ona faatino polokalame e faaleleia ma faamalosia ai atinae i nuu i tua e ala lea i le polokalame ua ta‘ua o le CSSP mo le atinae o faalapotopotoga a le lautele o le atunuu.
O suiga ua tuuina mai e le fesoasoani lenei, na ta‘ua e le Alii Palemia i lana saunoa i lea fonotaga o le a tele le faamalosi o le a vaaia ai i atinae ua ave i ai le faamuamua a atumotu taitasi.
Mo Samoa lava ia o loo faaauau ona ave le faamuamua o lea fesoasoani i le faamamāina ma le faaleleia o le suavai mamā e maua e Samoa e pei ona sainia ai i le vaiaso na tea nei se tinoitupe e $54 miliona tala mo lea atinae tele.
E le gata i lea ua faaopoopo ma le lagolago i le atinae o nuu ma faalapotopotoga tumaoti o se auala na ia ta‘ua o le a faaitiitia ai le ola lē tagolima ma fesootai ai pea Samoa ma ona tuaoi i galuega fia faatino auā le manuia lautele o atunuu uma.
O le ofisa o le Fono a le Pasefika le FORUM lea e ta‘ita‘i ai foi le isi tamalii o Samoa, le afioga Tuiloma Neroni Slade, ma o ia o loo nafa ma le faasoasoaina o fesoasoani o loo aumai i lalo o le EDF i atumotu eseese o le Pasefika.
O le fautuaga na ia tuuina mai i Minisita o atunuu e 14 na auai mai i Samoa mo lenei fono tele, ia faaaogā lelei fesoasoani ua maua i lalo o lenei polokalame ma ia mautinoa e manino atinae ua ave i ai le faamuamua a le Pasefika.
Faaalia e Tuiloma e tāua le mautu o le pulea lelei o nei fesoasoani i le faaauau ai i le lumanai. Na ia faaalia foi o le polokalame a le EDF mai i le 2014 i le 2020 o le a maua ai le avanoa i le Iuni a Europa ma atunuu o le Pasefika e faamalosia le va galulue faatasi i atinae o le a faatino i lenei fesoasoani tele.
O le faaleleia lava o le itu tau i le tali atu a le Pasefika i suiga ogaoga o le tau, o le puipuiga o le siosiomaga, o le faaleleia o faigafaiva ma le lava tapena o suesuega i soo se atinae ua taulai i ai lenei fesoasoani, e lē gata i lea o le faaleleia o fefaatauaiga, o le faaleleia o tulafono e puipuia ai aiā tatau faaletagata ma le atinae o le soifua i aso uma o tagata lautele ua aofia uma i lenei fuafuaga mo tausaga ua faataatia mai ai lenei fesoasoani.
O le faaleleia o ia tulaga uma i lalo o le fesoasoasni a le EDF i lona tausaga lona 11 lenei, ua ta‘ua e le Failautusi aoao o le FORUM o le a faapea ona molimauina ai faigamalo e umi ona tulai mai ma ta‘uleleia i le pulea lelei lea o nei fesoasoani.