Ia faamua sa tatou faapolo ma se faasagi i le tapaau i le lagi, ua talia faautugatagi, ua ta‘ooto peau o le sami moe foi ma matamatagi. Ae faataalolo ia paia o Samoa mai le tai samasama o le Tui Manu‘a seia paia le tai ulaula o Nafanua – o paia ia e lē vāea – e tumau seia oo lava i le faavavau. O paia o le aoao tetele o le tatou atunuu i Samoa ma Aotearoa nei.
O le a se‘i fana tonu ia le malama ae vili tonu le ifi o maina. Ou te toe fia faaopoopo atu i la‘u faafetai na momoli atu mo le tatou Atunuu i luga o le alaleo 1593AM i le Aso Faraile ua tea.
Faafetai Samoa mo le tapuaiga mamana, i le aufai tofa ma le aupuputoa a le tatou Atunuu i Aotearoa, o paia ia o le tafāono o Samoa. E lē mafai ona faagaloina lo outou lagolago mai ma la outou fesoasoani mai i soo se auala, i le tele o taimi, a o faagasolo le faiga kemupeini.
E toe momoli atu la‘u faafetai i le Komiti o le Leipa i Magele sa nafa ma galuega faatino o le kemupeini. Faafetai i le autalavou sa lagolago mai. Faafetai mo la outou fesoasoani tau tupe, taleni faaalia ma outou taimi tāua sa foai mai e aunoa ma se taui. E lē mafai ona faagaloina ia te au la outou taufai pati mai, ma aiaiuli mai ia te au i taimi uma, i tu ma aganuu ma gagana eseese o le Pasefika.
Ou te faafetai foi i le Afioga i le Hai Komesina o Samoa, faapea le afioga i le Konesula Aoao ma le Komesina o Fefaatauaiga – o sui vaaia ia o le tatou Malo Tutoatasi o Samoa i Aotearoa nei. E ui o a‘u o le faipule Niu Sila, ae e lē mafai lava ona faagaloina le tapuaiga mamalu a le tatou Atunuu pele o Samoa i ona tulaga maualuluga ma tulaga faalupe.
Ou te toe fia faaopoopo atu foi le faafetai i le tapuaiga a le aufaigaluega paia a le Atua, i susuga i faafeaigaiga ma latou faletua ma le mamalu i Ekalesia eseese, faapea foi le Afioga ia Patele ma Patele, ma afioga i Tamaitai Sa – o ā o loo talaia le finagalo o le Atua i itu e fā o Aotearoa ma Samoa. Faafetai tele mo a outou talosaga, ma a outou faamanuiaga ma upu faamalosiau i soo se taimi a o faatino o‘u tiute.
A ou liliu i nai o‘u aiga pele, uo ma ē ua masani, faapea foi ni o‘u paolo ma ni ou gafa maualuluga, gafa tau tupu ma ni o‘u maluapapa i le tafafā o Samoa ma le lalolagi atoa. Faafetai i lo outou lagolago mai – i lo outou afu toto ma le afu liligi, i soo se auala eseese.
Faafetai foi i lo‘u tamā pele i le afioga ia Aupito Pupu Sio, le afioga i le Sa‘o Usoalii. Faafetai i lau faufautua mai i lo‘u mafaufau vaivai i soo se taimi i soo se tulaga. Sa ou lagona lava lo‘u loto tele ma le mafanafana ona o lou tuualalo mai ia te au i taimi uma. Faafetai mo au faamanuiaga ia te au.
E lē faagaloina foi le tautua matavela a le au faasalalau tala i nusipepa eseese ma alaleo i Aotearoa nei. E telē la outou sao ma le fesoasoani ia i matou ma le tatou Atunuu i soo se mataupu.
E faapitoa la‘u faafetai i lau susuga i le Faafeagaiga, Pastor Lui Ponifasio ma le faletua, aemaise le aufaigaluega a le Leitio Samoa 1593AM ma le Samoa Times. E lē mafai ona faagaloina la outou tautua ia Samoa i le tele o avanoa ma le fesoasoani i le faalauaiteleina o mataupu sa luga lalo ai polokiki i Niu Sila nei.
Ia avea foi lenei avanoa e toe momoli atu ai la‘u faamalo ma le faamanuiaga i le sui fou o Samoa lea ua ofi i le lalo o le vaega a le NZ First. Faamalo le tau, faamalo le toa ia lau afioga Leau Asenati Taylor. E moni lava le muagagana a Samoa – e au le inailau a tamaitai. Ia manuia lou alo atu i lou tofi.
Ou te faamanuia atu foi i le toe pale mai o le afioga ia Peseta Sam Lotu-Iiga, o le sui o le Malo a le National.
Ou te talitonu e ui lava e eseese tatou vaega faaupufai, ae ou te manatu e iai lava mataupu e mafai ai ona tatou galulue faatasi ma soalaupule auā le sailiga o se manuia o Samoa i le lumanai.
I isi o‘u uso a sui tauva – aemaise sui a le Leipa, i le susuga ia Carmel Sepuloni, Jerome Mika, Nick Bakulich, Anahila Suisuiki, Peter Foster, Kris Faafoi, Charles Chauvel faapea le afioga ia Tuifaasisina Meaole Keil. Malo le tau, malo le tauivi, malo le finau.
E ui ua malolo le tatou sailiga malo ma le tatou taumafaiga e faatū le faigamalo a le Leipa – ae toe oso lava le la. Tatou vaai i luma ma tulimatai le tausaga 2014 mo se tatou ‘ai. Ou te manatu le Atunuu peleina, o a‘u o se auauna faatauvaa, ae ana leai lo outou lagolago mai e lē taunuu so‘u faamoemoe.
Ou te manatu o le mana ma le taitaiga a le Atua Silisiliese e faavavau – faatasi ma la outou faufautua tuualalo mai ia te au i soo se auala – ua mafai ai ona maua so‘u manatu o lea ua iu ma le manuia le faigapalota, ua sili atu lava pasene o palota ua ou mauaina i Magele i lo se isi lava faipule a le Leipa i Aotearoa.
Ou te lē mimita ai pe ou te faamaualuga ai, na o le naunauga ia ou tautua ma le faamaoni i luma o le Atua auā le mamalu o le tatou Atunuu.
E lē faagaloina la outou lagolago mai i auala eseese. E lē avea foi nei tofiga e fai ma tulaga e galo ai ia te au le tatou va fealoaloai ma le va faamatai, ona o a‘u lava o le Samoa moni – o a‘u lava o se atalii, uso, poo se tuagane ia te outou.
Faaiu atu sa‘u faamatalaga, ia alofa le Atua tumau pea le soifua laulelei ma ana faamanuiaga i tupu ma e‘e o Samoa faapea le aufaigaluega paia a le Atua i itu e fia o Aotearoa. Ia faamanuia le Atua i tupulaga talavou mo le lumanai.
Soifua, o a‘u o Su‘a Viliamu Sio, faipule a Magele.
