Faafetai Royal New Zealand Air Force ia Samoa

O le vaiaso talu ai na faatofa ma faamavae atu ai le vaega a le Royal New Zealand Air Force (RNZAF) ia Samoa, aemaise nai uo ma paaga sa latou galulue faatasi, ina ua iu manuia la latou misiona sa tolauapi ai ma galulue i totonu o le atunuu i le masina talu ai.
O le tele o galuega laveai na latou faatino sa faamatilatila ai le latou auaunaga fesoasoani e tatau ona tuuina atu aua le puipuiga saogalemu o tagata o le atunuu, aemaise lava i taimi o mala faafuasei poo mala faalenatura.
Sa tele ina faamautu lenei vaega i nofoaga o le malo i Satapuala e latalata i le malaevaalele faavaomalo, ma e pei ona faailoa atu foi i nisi o tala talu ai, sa faatino foi nisi o a latou asiasiga i aoga eseese a le malo ma aoga a ekalesia.
Na oo foi le latou auaunaga i le motu tele i Salafai, ma ofoina foi nisi o meaalofa i fanau aoga aua lava le uunaia atili o tautua faakomiuniti.
Na faaleo e lenei vaega a le fitafita a Niu Sila lo latou faafetai i le lagolagosua a tagatanuu o Samoa aemaise o le agaga talimalo sa faaaalia ia i latou i le taimi atoa na faamautu ai i totonu o le atunuu.
O nisi o mea na matilatila i le latou misiona o le maua o le avanoa e featufai ai o latou tomai ma silafia ma nisi foi o matagaluega a le malo Samoa, e pei o le vaega a Leoleo, Tineimu, le Puipuiga Lautele, le vaega o Felauaiga, le ofisa o Turisi, ma le malosi faaletise ma le vaega o Faasalalauga.
Ua toe taliu manuia mai nei la le RNZN i Niu Sila, ae ua faafetaia foi e le tele o tagatanuu o Samoa, le avanoa na latou silasila ma faataitai ai i nisi o auaunaga tomai o loo faatino e lenei vaega.
O le taimi nei e tusa ma le 790 i latou mai le New Zealand Defence Force o loo galulue i vaega eseese e 14 mo le tausia o le filemu, i misiona a le faalapotopotoga a Malo Aufaatasi, ma le faatinoga o isi auaunaga i atunuu e 10.