E na o le faafetai lava ma loimata maligi na vaaia i le aso na faapea ona faamautu ai le magalo o pagota e to‘a 35 mai i le nofosala i le falepuipui ma aiaiga o palola i se sauniga e faamautu ai lea meaalofa – o se vaega o le faamanatuina o le 50 o tausaga o le sa’olotoga o Samoa.
O le afioga mamalu i le Ao o le Malo o Samoa, le Afioga i le Tui Atua Tupua Tamasese Efi na talosagaina le Komiti o le palola i le afioga i le Faamsasino Sili faapea sui o le lala o le Tulafono ina ia tagai i se fuafuaga faapea aemaise mo i latou ua faamaonia le talafeagai ona fai i ai o lenei faaiuga.
Faaalia e le Alii Palemia le Susuga Tuilaepa Lupesoliai Sailele Malielegaoi, o le filifiliga o i latou nei na aofia ai le faamatuu uma ese loa o aiaiga o palola mo i latou ua faapea ona magalo i le palola i tausaga ua tuanai ae sa nonofo lava ma aiaiga nei e toe tulai mai loa i nisi solitulafono mautinoa loa le toe tuli atoa o faasalaga na muai taofia ai faafalepuipui, ma e to‘a 20 i latou na aofia ai i lea iloiloga.
O le isi to‘a 15 o tagata e oo mai lava i le tutoatasi o Samoa o loo taofia lava i toese i totonu o le atunuu i Tafaigata ma Vaiaata ae ua iai le manatu o le Matagaluega o Leoleo ma Falepuipui aemaise o sui o le komiti e pulea le Palola ua talafeagai le ave i ai o le faamagaloga e pei ona iai lenei meaalofa faapitoa.
O le alii Palemia lava la na agai ane e saunoa ina ua faamautu lenei meaalofa a le malo ma lana fautuaga na tuu atu ia i latou ua faamanuiaina e leai, leai lava ma se alo o le tulafono i se tasi o i latou nei e toe tulai mai foi i nisi solitulafono.
O le saolotoga ua tuu atu na ta‘ua e le alii Palemia e tatau ona matua teufatu ia i latou ua maua ona e lei faigofie le faaiuga ua faia. O le alii sa avea ma Minisita o le Kapeneta i faigamalo ua tuanai a Samoa le fetalaiga ia Leafa Vitale, o ia lea o se tasi na faapea ona maua le faamagaloga lenei ma na ia ta‘ua ai le faafetaia o le faaiuga ua fai aemaise o le faamagaloga a le Malo ua toe saoloto ai.
O lana faafetai sili o le musumusuina o le Agaga o le Atua o taitai o le malo ua mafai ai ona faasaoloto o ia. O Leafa Vitale ma Toi Aukuso sui Minisita ia na sala faafalepuipui i le fafauga o le gaioiga na tagatavaleina ai se isi sui Minisita, le Afioga Luagalau Levaula Kamu i le tausaga e 1999. Ua maliu Toi Aukuso ae na umi se taimi o faataotolia Leafa Vitale i le toese i Tafaigata.
O le lua tausaga talu ai lea na faatoa mafai ai loa ona magalo i le palola ona ua moomia lava togafitiga i le faataotolia ai o ia i gasegase o le tino. O loo taoto lava foi la i lona aiga i le taimi lenei. O le faamatalaga a le alii Palemia, ia faatea faaletonu o tausaga ua tuanai ae ia agai i luma soifua o i latou ua maua lenei faamanuiaga le au maua.
