O le faaiuga o le vaiaso na tea nei na molimauina ai se fiafia tele na faatautaia i le afioaga o Mulivai Safata auā le sami ai o se galuega tele ua toatele i latou na pulupululima faatasi ina ia faataunuuina. O lea galuega o le faletusi fou ma le nofoaga fou a le Aoga laititi a lea afioaga.
O le unai a se tamaitai Pisikoa o loo galue ai i le aoga le tamaitai o Karen Corey atoa ai mātua ma faiaoga o lenei aoga, ua tino mai ai lenei galuega tele – o se galuega e oo atu i le $54,000 lona tau atoa.
O le amataga o aoga o le tausaga na tea nei, na faapea ona saili ai le tamaitai lenei mo se masini computer ma se masini e fai ai kopi o galuega i le ofisa o le aoga ma agai ai loa i le sui konesula o Siamani i Samoa mo se fesoasoani.
Na maua se tinoitupe e $15,000 tala mai i le Ofisa o Siamani i Samoa ma faatau ai ia masini. O ina na amata ai loa le agai o le Fono a Matua ma Faiaoga a le aoga a Mulivai mo se faaopoopoga o fesoasoani aua le atinae ai o le tulaga i aoaoga a le fanau.
O tusi aoga na amata ai lenei sailiga ma na maua mai tusi faitau a le fanau mai i faalapotopotoga ma kamupani i fafo e pei o le Asosi faavaomalo o tusi faitau, o le fesoasoani i tusi faitau e ta‘ua o le Darien, o le faalaotopotoga Amerika e feagai ma le saunia o tusi faitau a fanau auā atunuu tauatiae faapea ai le faalapotopotoga fesoasoani a Niu Sila e ta‘ua o le Ocean of Books poo le vasa o tusi faitau – o le asosi lava a Matua ma Faiaoga na o latou totogia le aumaiga o tusi faitau nei e ala i le tupe na totogi i le auina mai o ia meaaoga.
O se aiga mai i Fielding i Niu Sila na asiasi mai i Samoa ma afea le aoga laititi lenei i Mulivai Safata na toe foi atu i Niu Sila ma faapea loa ona amata aoina tusi faitau mo le fanau.
Ma o Iulai o le tausaga na tea nei sa toe fesootai mai ai loa Shane Hoggard, le tamā o le aiga ma logo mai le aoga i tusi faitau ua o latou aoina mo Mulivai Safata.
O se fesoasoani na talafeagai lelei le aoina ma le malaga mai o se vaalele a le Fuavaatau a Niu Sila lea na aumai ai loa pusa tusi faitau e 60 atoa ai le tele o meataalo mo le fanau i Mulivau.
Na faaauau pea le galuega lenei a lea aiga i Niu Sila ma faalautele atu foi i le Kolisi a Palalaua i le itumalo o Siumu. O le masina lenei e taunuu mai ai foi se isi uta o tusi faitau ma isi totoga o faleaoga mo aoga nei e lua mai i lea lava aiga.
O le tausaga lenei na talosaga ai le asosi a Matua ma Faiaoga a Mulivai Safata i ni fesoasoani auā le faatuina o se nofoaga tutotonu o aoaoga faa-computers i totonu o le afioaga ma o lea la na maua mai ai le fesoasoani i le faalapotopotoga e ofo atu fesoasoani i atinae i tua i nuu ma e $24,000 le tupe na aumai ai mo le faatau ai o ni masini computers mo le faamoemoe e pei ona ta‘ua.
E $4000 tala lava na maua e le asosi o Matua ma Faiaoga ia latou foi sailiga mo le faamoemoe lava lea o se potu o computers.
O le Ofisa o Siamani i Ueligitone na toe aapa mai foi ma faaopoopo le seleni mo le faapipii ai o masini computers nei ma fesootaiga tau internet e moomia mo le faatinoga o aoaoga a fanau.
O lea la ua tino mai ai nei galuega tetele o le faletusi tele o le aoga atoa ai ma le potu mo aoaoga o tomai faaonapo nei i fesootaiga.
O se fiafiaga tele o le afioaga na manino i lea aso na tatala aloaia ai lenei galuega aemaise o le faafetai i tagata uma ma aiga, o faalapotopotoga ma kamupani ua liligi mai lo latou maau mo lenei faamoemoe i le atinaega o fanau a le afioaga aemaise o le unai ai o le tomai faitautusi atoa ai ma fesootaiga televavave ua tele ina faatino ai galuega i lenei vaitaimi.
O le tatala aloaia o lenei faamoemoe na talafeagai lelei ma le faaiu ai o le vaiaso atoa na ave ai le faamuamua i le faitau tusi i le atunuu lea na agai ai faletusi, atoa ai ma le matagaluega o Aoga i aoga eseese mo le unaia o le faitautusi, o le tusi o solo ma le faamatalaina o fagogo, o se faiga e faalelei atili ai lea vaega o le ola aoaoina o fanau i le atunuu.
