Galumalemana Savai’inaea Emanuele Galumalemana
“Aua ne’i ia te’i matou ae i’a i lau Afio pea le viiga”
Matou te fa’amanuia atu lenei Tausaga Fou 2013, i le alofa ma le agalelei o le Tapa’au i le lagi.
E manatua ai fo’i i o matou fatu ma agaga le aso soifua o si o matou tama peleina, le afioga ia Galumalemana Savai’inaea Emanuele Galumalemana, i le aso 6 Ianuari 2013.
E ui ina ua fai i lagi le tuligasia, ae oni nai toe sa’afiafiaga nei.
O ia o le suli o le Atua, ole ua sili on pele i o matou loto, o matou olaga, o ia o lo matou ola, o lo matou o’lo, ma lo matou malu i fesouaina ma fita o lenei olaga.
Sa o matou tiu ai, ma o ia foi ole sulu ma le malamalama e le gata i le fanau, aiga, faapea ona gafa. O vituti sa ia ao’ao’ ia matou savavali ai, o le faatuatua, faalagolago i le Atua, ae maise le alofa. O lana a’upega, o le taulaga paia o le misasa, o le losalio, ma talosaga, lenei ua matou ‘aeae ai manū i lenei olaga.
Na amia o ia e lona matai, ma motusia ai le mafutaga mafanafana ma le fanau i le aso 23 o Iuni, 2012, i lona maota i Niu Sila nei, 6 Parkstone Place, Favona, Aukilani.
O lea matou te saga vivi’i, faamanu, ma fa’afetai ai le Atua ona o lana pule to ma lana pule fa’asoifua. Ae avea ia lenei avanoa fa’aauro ma le taua, e fa’aleo atu ai male agaga fa’afetai i o matou aiga, o matou gafa sili i lagi, ma ni o matou paolo matou te malu ai, faapea uo mamae, ma o matou tuaoi.
Le pa’ia o le au faigalueaga a le Atua; Lau Afioga i le Akiepikopo o le Pule’aga Fa’aakiepikopo a Samoa-Apia, Alapati Lui Mata’eliga, le Paia o le ituaiga Sa, Lau afioga Patele Lio Doyle, Lau afioga Patele Talipope Tuala faapea Lau afioga Patele Pio Galumalemana faapea ou uso a Pelepitelo, aemaise lau afioga Patele Falaniko Stowers, o le tamā pule o le Palisi i Onehunga.
Tama’ita’isa o le aiga Sa Karamelī, Tama’ita’isa mo e matitiva, Tama’ita’i sa o le aga’alofa, Alii Felela, Aofa’alupega ma o latou faletua i soo se fata faitaulaga, Le mamalu i le aufaipese a le Palisi Katoliko Roma i Onehunga. Le Autau a Maria i Onehunga.
Le Paia o Niniva i Vailele ma le Paia o le Aiga i Matamatanonofo. Ae tainane lau afioga i le Sui Ao mamalu o le malo o Samoa, lau afioga i le Tama a Aiga, lau afioga i le Tuia’ana Tuimalealiifano ma lau Masiofo. Lau afioga i le Fofoga Fetalai o le Maota Fono o Samoa, lau afioga i le Laaulialemalietoa ma lau Masiofo.
Ae le fa’agaloina ai le susuga i le alii foma’i Brian Thompson ma lana aufaigaluega, ile Blockhouse Bay Medical centre, le auaunaga faasoifua maloloina, Counties Manukau District Health Board, ma le Pacific Home Care i Aukilani i Saute.
A’o apulusia tofaga ma le fala efu i le afioga i le aloalii, lana afioga i le ma’opu, le afioga ia Galumalemana Savaiinaea Emanuele Galumalemana, sa ia folau ai i tofaga malū ona o le malosi o le alofa faatino, e ala mai i kalasia eseese na outou aao iai. O asiasiga ma talosaga, o Novena ma anapogi faapea a outou faamanuiaga ma apoapoaiga, aemaise i taulaga Paia o Misasa, ma le Sakalameta Pa’ia o le Eukalesitia.
E le’i faapa’ole foi ona togafitiga, pe a mana’omia. O lo outou gapatia ma lo outou agalelei, na malolosi ai i matou le fanau. Sa avea ma measuamalie ma vai malu, i la matou mafutaga mafanafana ae fusia i le alofa ma si o matou tamā pele.
O lo outou agalelei lea ma lo outou agalofa, a’o malomaloa lona faatafa. Sa outou le’i solomuli ai, se’ia o’o i lona tu’umalo ona o le valaau paia a lona Matai. Aua e leai se fai loto.
O lo outou tau peau mai i vasa e fia, ma le tagi mai i ala. Sa outou fa’alia ai le alofa mafola, ma lo outou so’oso’o taua’u e ala i faamaisega, Le Toga Paia, le Seleni ma palapala malo, teu fugala’au, ie papālagi, aemaise la outou fusi mai, ma lo outou pa’i mai. Na o matou molimauina le alofa moni o le matua i lana fanau.
Na o matou loto tetele ma o matou mafanafana ai i mafatiaga, ona o le toesea o le tamā pele. Faapei o le fetalaiga a Iesu. “Amuia e faanoanoa, aua e faamanafanafaina i latou”.
Lau afioga Patele Falaniko Stowers, ua o se toa le faiva fita, i le sauniuniga o lona agaga. I le faauuga mulimuli ma le Viātiko o talisuaga. Le sini lea o mitamitaga, ua lava ta oso lana Malaga. O le agaga faagae’etia ma le faafetai i lou alofa tula’i, mo toe sauniga o si o matou tamā pele.
Lau afioga Patele Pio Galumalemana, faafetai ma faamalo i toe sauniga o Tamā, na toe sasa’a ai lau utu. Tino e’ o ni ufi e tutupu.
Ae le faaitiitia ai lo matou agaga faafetai, i lau afioga Patele Iosefo Timu, Tamā pule Ekalesia Katoliko Samoa i Aukilani.
Lau afioga Patele Sami Sefo, lau afioga Patele Talipope Tuala, lau afioga Patele Savelio Tevaga, lau afioga Patele Michael Enderman, faapea lau afioga Patele Mikaele Tevaga, Tama’ita’isa o le Agaalofa (Sisters of Mercy), Tama’ita’isa mo e matitiva (Little Sisters of the Poor), Tama’ita’i sa o Nasareta (Sisters of our Lady of Nazareth), faamalo faafetai. Le susuga ile faletua ole Pule-lua ole Kolisi Telosia i Malua. Le susuga ile faletua ia Lalokava Ma’afala Limā.
Aufaipese Palisi Onehunga, Aufaipese Katoliko Samoa i Onehunga, Ekalesia Katoliko Samoa i Onehunga, Ekalesia Katoliko Tonga i Onehunga, Autau a Maria i Onehunga, Ituaiga o Iesu le Agamalū (Divine Mercy). Autalavou Ekalesia Katoliko i Glen Innes, Tama Tuai a Malisi i Aukilani, ae le faagaloina le laumua o James Cook High School i Manurewa. Le tautua a le G’Mana Wholesale Autos i Papatoetoe, auaunaga a Doctor Brian Thomson ma le Blockhouse Bay Medical Center, le tautua a le Waters Funeral Services Ltd, Papatoetoe. Aemaise le Our Lady of the Assumption Parish, i Onehunga.
Momoli le faafetai faapitoa i si o matou nuu pele i le agaga i Vailele.
O le Paia lava lea o Niniva, auā le Afio o le Oloa, afifio le falefia o alii, afio o lo outou Ma’opu, susu le Gataiala, alalata’i Nofoa ma le Tuanofoa ma le mamalu i le nofoaituaiga ia te oe Saleupolu.
Momoli foi le agaga ole fa’afetai, mai ile ta’ele o matou loto, lau afioga ile Fofoga ole Alataua, lau afioga Tuliaupupu Pala Limā.
O Sa ma faigata, atoa fo’i ma paia ma mamalu sa o tatou faatasi ai i toe sauniga o si o matou Tamā pele. E iloa le Isaraelu moni ile susu’e o lona fa’amalama. Lau afioga ile Fofoga Fetalai ole Maota Fono o Samoa, lau afioga La’aulialemalietoa Anae Lupematasila Polataivao Fosi-Schmidt. E moni ai se tasi o muagagana, e mamafa le toto i lo le vai. Fa’amalo, fa’afetai, fa’afetai tele.
Sainia ma lo matou agaga fa’aaloalo ma le fa’agaeetia :
Afioga ile aloalii, Galumalemana Fetaia’imauso Marion ma le masiofo ia Nila Galumalemana, afioga Toleafoa Joseph Savaiinaea Galumalemana, afioga Anae Petelo ma le faletua Tangi Galumalemana, tofā Manuoniniva Togisia ma le tausi Malia Galumalemana, afioga ia Tauiliili Ikenasio ma le faletua ia Mary Galumalemana, tofa Tuiafiso Melania Smilie ma le afioga ia Tagaloa Enitima Robertson; le faletua ia Sekolasetika Stica Siliuā ma le afioga ile matua Sulamanaia Fa’aeteete Lima, afioga ia Fuailelagi Sesilia Savaiinaea Galumalemana fa’apea fanau iti.
