Faafetai le Kovana i le 30 Tausaga o le FM89.3

O le Aso Toonai na valaaulia faapitoa ai le Afioga i le Kovana Sili o Niu Sau Uelese le afioga ia Marie Bashir i le faamanatuina o le tolusefulu tausaga o le tautua a le Leitio FM89.3 2GLF i Liverpool talu mai le 1983.
O se aso faapitoa i le Puleaga o le FM89.3 aua na tatala ai foi ma lana ofisa faasalalau ma masini faaonaponei lea na ootiina le lipine e le afioga i le tamaitai Kovana i lona  nofoaga fou i le 161 Bigge Street i Liverpool.
O le polokalame Samoa Sportstar Show na fai ma sui o Samoa i lea sauniga aloaia. O Aso Lua taitasi mai le lua i le aoauli agai i le fa i le afiafi e faasalalauina ai lenei polokalame e le faatamā o le Asosi Tusitala ma faasalalauga ia Leaupepe Matautu faapea le Faatonu ia Leilua Jerry Uesele.
O aso uma foi o le vaiaso i soo se taimi e mafai ona faalogologo ai le mamalu o Samoa i Sini nei ma Ausetalia faapea mai Samoa ma soo se atunuu o le lalolagi i polokalame tuai i le gagana Samoa.
O le upega tafailagi o le www.893fm.com.au e mafai ona maua ai nei polokalame ua uma na faasalalauina.
Saunoa Leilua e aoga lenei faiga fou i leitio pe a toe fia saili aso o faasalalauga, fonotaga, siva, numera o pisinisi ma talafou ua tuanai ma polokalame tuusao. “O le laasaga fou lenei ua iai lenei talutalu fou o masini faaneionapo.”
Na amata le sauniga aloaia i le Vii o le malo o Ausetalia ma faafeiloai ai le kovana e le Afioga i le Taitaifono o le Leitio ia Ian Becker.
Na patipati ma faafeiloai fiafia le aofia i le tulai o le Afioga i le Kovana mo lana saunoaga autu, “E avea au e fai ma sui o le malo o Niu Sau Uelese ma Ausetalia e momoli atu ai le Faamalo ma le Faafetai i le puleaga ma sui uma o lenei leitio mo le filiga ma le tausinio mo mea lelei talu mai lona faavaeina i le 1983 e tusa ma le 30 tausaga talu ai.”
“O le nofoaga lenei e faatuina ai le ofisa fou i le 161 Bigge Street,Liverpool e faaigoaina i le Komesina muamua o Liverpool ia George Bigge lea na faamanatu ai e le kovana o Liverpool i le luaselau (250yrs) tausaga talu ai o Kovana Lachlan Macquarie le amataga o le nofoia o lenei aai.
O lenei itula ou te fiafia tele e faailoa le Aso fanau lona  tolusefulu ma le ofisa fou o se tautua ua tele lona sao i le tuufaatasia o le aai o liverpool e ala i faasalalauga.”
“E le gata o le lototetele o sui e toatolu na amata maia lenei leitio i le 1983 ia Frank Scambary, Joan Killorn ma James Tumeth, e momoli atu foi le faafetai tele i atunuu eseese ua potopoto faatasi e tautuaina o latou tagatanuu i luga o le alaleo a le FM89.3”
“O Ausetalia o se atunuu na fausia mai i tagatanuu eseese (multicultural) ma o le felanulanuai o tu ma aganuu  eseese o loo fausia le FM89.3 2GLF o se faataitaiga maoae mo lo tatou atunuu matagofie.”
Na auai foi le Pulenuu o Liverpool ia Ned Mannoun i lea faamoemoe faapea sui a Faipule le tamaitai  ia Melanie Gibbons.
O le Samoa Sportstar Show  www.samoasportstar.com ma le Aso Fitu i taeao o Aso Toonai o loo tauaveina le Fu‘a a Samoa i Liverpool. O nisi o faasalalauga Tauoloa na faafofoga i ai Samoa i Sini nei na tautua atu ai le FM89.3 e aofia ai le Siamupini muamua a le taitoafitu a le manu Samoa i Adelaide i le 2010, Siamupini Aoao a le Manu Samoa i le tauvaga Taitoafitu a le IRB i Sikotilani 2010 faapea le saunoaga a le Palemia o Samoa na tatalaina le konesula i Sini 2012 faapea le Aso Fanau o le HRPP i le 2012.
O isi atunuu na matagofie ai le faamoemoe i le Aso Toonai o le faailipu bagpipes a Sikotilani i Liverpool na faafeaoina le kovana. O le ituaiga Khmer na faapaiaina le Aso.
Na uma le taumafataga valaaulia le aofia i se taumafataga ma se siva tele na saunia e le mafutaga a Iraqi i Liverpool.
Na feiloai uma ai foi isi atunuu ma latou polokalame e pei o Initia Punjabi, Filipino, Lao, Aferika Sudan, Siamani, Polani, Gujarati Cambodia ma isi Polokalame Faaperetania i musika, tupulaga, talafou ma matagaluega eseese a le malo.