Faafetai i le tulafono taufaaofi o taumafa – Fofoga Fetalai

O le taualumaga a le Palemene lea faatoa mae‘a atu i le vaiaso na tea nei na aofia ai le folasia o se tulafono taufaaofi a le Matagaluega o le Soifua Maloloina ina ia faamalosia ai le tulaga o oloa ia e aumai i totonu o le atunuu.
O loo sosoo lava faitioga i nisi o oloa ua maua e le lautele o le atunuu ua leaga ma ua uma aso faatulagaina e tatau ona faatau ai ae o loo faatau lava.
O le oloa aupito tele i ai faitioga o apa eleni ma ua oo lava i luma o le Palemene finauga ina ia matuā vaavaai lelei le mau eleni ua ofi mai i totonu o Samoa.
O le vaiaso na tea nei na faalauiloa ai foi e se aiga mai i Vaitele le faanoanoa tele ona o se latou pusa apa na maua mai i se maliu i Sapapalii i Savaii ae tatala atu apa eleni ae iloa ai e ese lava le pepa lea e ufiufi mai ai le apa i‘a lea, ese le isi pepa o i totonu atu.
Na saili auiliili le aiga ma iloa ai o le apa i luga o le oloa lenei e foliga mai o loo vali, ma na valuvalu ese le vali lea ma iloa ai e ese le aso lea sa vali i luga o le apa o le aso ua gata ai le aogā o le apa eleni, ese le aso lea ua vaaia ina ua valuvalu ese le vali lea.
Sa lē iloa e le aiga poo ai tonu le kamupani e sau ai le apa eleni ma logo loa tusitala e faalauiloa. Na iloa mulimuli o le Ah Liki Wholesale e aumaia i Samoa lenei ituaiga eleni ae e pei foi ona laga e sui a faipule i le Palemene, atonu ua autausagā o faataamilo nei pusa apa ona o faalavelave i totonu o le atunuu ma na ta‘ua foi e le Ah Liki Wholesale, ina ua tapa so latou finagalo, e tele isi kamupani laiti o loo faatau atu pusa apa nei e mafai foi ona faasino i ai tuua‘iga, ae o le latou galuega i le aumai o ia oloa e mae‘a loa le aogā ona lē toe faatauina loa lea.
Faaalia e le Fofoga o le Maota o le Palemene, le Afioga Laaulialemalietoa Leuatea Polataivao Schmidt, o le taumafaiga a le Soifua Maloloina e ala i le tulafono taufaaofi ua i luma nei o le Palemene, ina ia mautinoa e siaki uma lava oloa nei a o lei faataga le faataua e kamupani o oloa siiatoa mai i fafo.
O se faataitaiga, na ia faaalia o le aumai uma i le Soifua Maloloina o eleni, poo pisupo, o ā lava oloa tuu apa ma taumafa e sau mai i fafo, auā faataitaiga ma faamautu atu ai le lelei atoatoa o lea oloa ma le tatala atu loa i ai o le avanoa e faatau mai ai i le atunuu.
Ta‘ua e le Fofoga Fetalai, e foliga mai ua avea le tatala o avanoa i oloa auina mai i le atunuu ma auala ua vaaia ai nei le tele o le “lapisi” ua aumai i le atunuu.
“Ae o le feagaiga o fefaatauaiga faavaomalo e pei ona ofi atu ai Samoa i le WTO o loo iai foi ana tulafono o loo maioio mai ai gaioiga e tatau ona faatino a o lei ofi mai se oloa i totonu o Samoa,” o lana faaopoopo lea.
O le a tālia la le pasia o lenei tulafono taifaaofi ina ia faamautu ai le lelei atoatoa o taumafa e faatau mai i fafo auā le taumafa a le atunuu i Samoa nei.