FAAFETAI I LE TAPUAIGA

E viia pea le agalelei o le Atua ona o Lona alofa le faatuaoia sa mafai ai ona faataunuuina lenei galuega e tautuaina ai si o tatou atunuu.

E le faagaloina foi lau tapuaiga Samoa.  O se faiva lava e le tapuaia, e ae ma le maumau.  Peitai, o lau tatalo ma lau tapuaiga sa mafai ai ona faataunuu lenei galuega.

Faafetai tele lava i nai tama ma tina matutua o si a matou ekalesia pele le EFKS i Otahuhu.  Aemaise lava tina ia Tautala Vaifale, Taufaoa Sua ma Talili Tautai.  E le gata foi i lea o uo ma e masani ma nai ou aiga tina matutua ia Nese Faitoa ma Petu Tulua.  Faafetai tele I la oulua tatalo mo lenei galuega.

E le galo foi nai ou aiga i Sini Ausetalia, faafetai tele lava ia te outou ma a outou fanau i la outou tapuaiga e le gata i le nusipepa ao le polokalame i le letio.  Alofa tele atu mo outou manuia le kirisimasi ma le tausagafou.

E momoli atu ai foi malu I puega ona o se sala o le auauna.  Afai sa manunu le toau ona o se manatu sa paopapa I la outou faafofogaga, faamolemole faamagalo le auauna faatauvaa.

O le naunau lava ina ia manuia ma maua se ai o fanau ao tatou aumau ai I nei atunuu.

Faamoemoe i le taitaina alofa a lo tatou Tama ina ia momoli atu lo outou soifua ma lou ola I le tausagafou ina ia faaauau o tatou tiute ua Ia totofi ai I tatou ao tatou iai I lenei lalolagi le tumau.

Ia maua se kirisimasi fiafia ma se tausagafou toafilemu.

Alofaaga o Faimai, Toleafoa Tuimauga ma le fanau.