Mai i le tausaga e 1952 ina ua faavae le Sosaiete a le Koluse Mumu i Samoa, o se lala o le Koluse Mumu a Niu Sila i lea vaitau, o lea faatoa molimauina i lona talafaasolopito sona lava fanua ma sona lava ofisa tutotonu. Ae i le mae‘a ai o le avea ma lala o le Koluse Mumu a Niu Sila, na see ese mai i le 1983 ma avea ma sui tutoatasi le sosaiete o le Koluse Mumu a Samoa. E ui o lea ua toe foi lava ia Niu Sila lea sosaiete ma saili fesoasoani ai atoa ai le malo o Samoa.
Na ofo e le malo o Samoa le fanua e ala i fesootaiga ma le Faalapotopotoga o Eleele a le atunuu le Samoa Lands Corporation. O iina na aumai ai loa ma le tali e faamatuu le lua eka i autafa o le nofoaga o tali i faalavelave faafuasei. O le fausia o le fale e tusa lona tau atoa ma le $2.2 miliona tala na sau i le Koluse Mumu a Niu Sila. E aofia i lea fale fou le nofoaga e gaosi ai le eletise mai i le la atoa ai le tupe e totogi ai le suavai faaaogā.
O le kamupani na manumalo i tauofoga o le fausia o lea fale o le Tavita Construction, o se kamupani na filifilia mai i le 10 o kamupani na tuuofo i lenei galuega. O le kamupani o inisinia a Leiataua Isikuki Punivalu na ave i ai le matafaioi o le pulea o le faatautaiga o lea galuega atoa ai ma le faamalumaluga a le Komiti o fale a le Koluse Mumu lea e faauluulu i ai le afioga Matataualiitia Afa Lesa, o le sui Peresetene o le Koluse Mumu a Samoa.
O le galuega na faatautaia i le tausaga na tea nei ae na faaopoopo nai vaiaso i le taimi faatulagaina ona o le faaletonu o le tau na tuai ai nisi o galuega ma le faitioga na sau i se isi sui o le Koluse Mumu, le alii Palemia, Tuilaepa Lupesoliai Sailele Malielegaoi, na ia ta‘ua ai le maualalo o le fale ma sii ai i le isi mita e tasi le maualuga. Ta‘ua e le alii Palemia i lana tusi i le Sosaiete e faaali ai ona atugaluga, e maualalo ma vevela le fale ma e foliga mai o se faletaavale ae ua lē o se ofisa tutotonu.
Ae i le tatalaga o lenei fale fou i le faaiuga o le vaiaso o le Sui palemia na ia faatautaia ona o le tele o tuatuagia o le Taitai o le Malo, ae o le Sui palemia o lona tuaa le afioga ia Lauofo Meti na ofo foi lona fanua i Lotopa ma lona fale i le vaitau o le 1980 ina ia mafai ai ona faatino galuega a le Koluse Mumu.
Na faaaogā foi le Maota o le Alofa i le ofisa o le Afioga Laulu Fetauimalemau Mataafa ina ia fai mai ai galuega faaofisa a lea faalapotopotoga. O le isi tina e suafa ia Ane Maiava na faaaogā foi lona fale i Matautu Uta e faatino ai nei galuega laveai ma toleni ai sui fesoasoani o le Koluse Mumu i tausaga ua mavae. Na faafetaia uma e le afioga Fonotoe Pierre Lauofo i latou nei, ma na faaluaina lea faafetai e le Peresetene o le Sosaiete, Vaasiliifiti Moelagi Jackson.
O le latou taumafaiga ina ia mautu se nofoaga mo lenei faalapotopotoga tāua i totonu o le atunuu lea ua agai mai ai lava ina faamautu i Tuanaimato ma le faamoemoe o le a lē toe tau saili fesoasoani i se nofoaga ma se fale lenei ofisa. Sa ofo foi e le malo se nofoaga i Motootua mo le Koluse Mumu ae na toe foi lava i Lotopa ma tapa ai le totogi e le Koluse Mumu a Iapani o le iai o lea faalapotopotoga i Lotopa.
O le taimi lenei e iai isi lala e ono o le Koluse Mumu i nuu ma afioaga o Upolu, Savaii Apolima ma Manono ma le faamoemoe ia fesootai uma nei lala i taimi o faalavelave faafuasei ma o le mafuaaga lea o le tāua o le nofoaga autu lenei i Tuanaimato mo le taulai uma i ai o ia fesootaiga.
E to‘a 100 alii ma tamaitai e ta‘ua o tagata fesoasoani o le Koluse Mumu e aunoa ma se totogi (volunteers) ae e to‘a 51 le aufaigaluega o loo totogi lava e le Faalapotopotoga.