Faafetai i le Atua manuia aoaoga Tausaga Fagaio

Ua faamanuiaina i le faaiuga o le vaiaso nei, se taumafaiga sailiili manuia o se alo o le atunuu le susuga Tausaga Fagaio, ina ua iu ma faauuina i lana faailoga o le avea ma se tasi o tagata faigaluega suesue (Investigator) mai le aoga a le National College of Security i Aukilani.

E pei ona silafia, o le susuga Tausaga sa avea ma se tasi sa fiafia e suesue ma lipoti tala (reporter) a le Samoa Times i nai tausaga ua mavae, sa ia pue ata foi ma fesootai i tagata eseese o le atunuu, sa tusitusi tala mo nisi foi nusipepa. I se faamatalaga a Tausaga, “E i ai taimi na ia suesueina ai nisi o tala e faatatau i ni aiga Samoa na aafia i faatauga taavale, ma e iai lava le tapulaa e le mafai ona ia oo i ai i le suesueina o nei tala. O le mafuaaga lea na ala ai ona ia momoo ina ia avea o ia ma tagata suesue iloga, e le gata i faalavelave e ono aafia ai le soifua, ae o le taumafaiga ia maua faamatalaga sao ma taofia mai tagata o loo latou faaaogaina nai o tatou tagata Samoa, i faiga piopio”.

O le amataga mai o le aoaoina o ia ina ia maua le tomai faatagata suesue, na ia taua o se mea e faigata tele i lona olaga aoaoina, ona e aofia ai i lea aoaoga le malamalama i le tulafono. Na ia taua foi, e tele mea sa tatau ona muta ai lona taumafai i le aoga, peitai o le lagolago a lona aiga lea ua mafai ai ona faataunuuina ma le manuia.

O Tausaga Fagaio o se alo mai le afioaga o Satuiatua i Gagaemale Savaii faapea le afioaga o Afega i Upolu. E toalua ona alo na auai faatasi i le molimauina o lona faauuga. O se tasi o kamupani i totonu o Aukilani o le a amata faigaluega ai i lana tomai fou, ma o lana faanaunauga, ia mafai ona faatuina sona lava ofisa i le lumanai, e le gata i le tautuaina o tagata Samoa ae o le atinaeina o lona aiga.