Faafeiloaiga o le uluai Pulea’oga Samoa i A’oga Katoliko i Ueligitone

Faapa’iaga o le Pulea’oga fou o Mike Savali e Patele

E ese le matagofie o le faafeiloaiga o le Pulea’oga fou a le Kolisi o Sagato Patelesio i Kilbirnie, Ueligitone i le Aso Lulu na tea nei i totonu lava o le Kolisi a St. Pats, i Ueligitone.
O le susuga i le Pulea’oga fou o Mike Savali o le alo o le susuga ia Papaalii Savali o Faleula ma le faletua ia Elisapeta Savali o Nofoalii.
I le sailiga o se Pulea’oga fou o St. Pats i Ueligitone na filifilia ai e le komiti (Board) le susuga ia Mike Savali e avea ma Pulea’oga fou o le Kolisi.
O Mike o se tasi o tama a’oga tuai o le Kolisi o Sagato Patelesio i Ueligitone, ma sa faia’oga muamua ai foi ina ua i’u mai i le Kolisi Faafaia’oga.
Na avea Mike ma Pulelua i le Kolisi a Sagata Patelesio i Silverstream, Lower Hutt mo ni nai tausaga, ma sa toe talosaga mo le Pulea’oga i St. Pats i Ueligitone ma ia mauaina e pei ona iai le faafeiloaiga i le vaiaso na tea nei.
E tele ona tomai sa tautua ai i le Ekalesia Katoliko a Iesu le Tupu mai lava i lona itiiti i le feagai ai ma le tapenaga o le misisa i lalo o le faasinoga a lona tuaa ia Papaalii Savali, (ua valaauina e le Atua).

Nisi o i latou sa auai i le faafeiloaiga o le puleaoga fou


Na faauuina e le afioga i le Patele Palagi o le Ekalesia Katoliko, ae o le Pulea’oga a St. Pats Silverstream ia Mr. Jerard Tully sa foaia le pulupulu Maori, o le meaalofa mai le Kolisi a Sagata Patelesio, Silverstream.
O se aso mamalu ma le matagofie i le faatinoga o tu ma aganuu faa-Maori aemaise foi o tu ma aganuu faa-Samoa.
E fiafia foi e faailoa atu le matagofie o tapenaga a le afioga ia Faumuina Savali le uso matua o Mike Savali, e tusa o lana saunoaga, sa fai ma sui o le aiga e fitoi tonu i uso ma tuafāfine o le Pulea’oga fou.
O le uso o le tuaa tamā o Mike, le Tofa ia Toomaialo Savali na fetalai e fai ma fofoga o aiga na lua e faafetaia afioga i Patele, Fesoasoani, le ekalesia a Iesu le Tupu ma auai atu e lagolago le faamoemoe i le paia ma le mamalu o le aofia.
Sa sili ona lelei tapena le Pulea’oga ia Mike e tusa o lana saunoaga faafeiloai ma faamalo ai i Pulea’oga uma o le itumalo o Ueligitone, afioga i Patele ma faia’oga, o si ona tamā ma lona tina, o si ona aiga faapea le ekalesia a Iesu le Tupu, Tama tuai o St. Pats, aemaise o tama a’oga a St. Pats, Ueligitone na latou faafiafiaina le aso i le latou haka.
Na ia lagona le fiafia e tusa o le lagolagoina o lona faamoemoe, ua faataunuu manuia ai mea uma.
Sa faaalia foi le agaga fiafia ma le faafetai tele o si ona tina, le faletua ia Elisapeta Savali ia i latou uma na faaavanoaina o latou taimi e faatasi atu, aemaise o le faafetai tele i le Asosi a mātua o le a’oga sa gapatia i le tapenaga o le taumafataga māmā mo i latou uma na faatasi atu i lenei aso tāua. Ua moni ai upu o le Tusi Sa: “O le tama poto e faafiafia ai le tamā, a o le tama valea e faanoanoa ai le tina.”
Ia manuia lau galuega fou Mike! O ou māmā na.

Mike Savali ma lona tuaa le tina ia Elisapeta Savali