O le vaaiga lenei i le vaiaso na tea nei i le nofoaga o le Matagaluega a Apia i le Sinoti a le Ekalesia Metotisi i lenei vaega o le atunuu.
O faaaloaloga ma fiafia i le faamautu ai o tofiga o nisi o faafeagaiga ma faletua ua siitia ma o le a galulue i totonu o le Sinoti lenei ua tu tonu i le ogatotonu o le taulaga o Apia.
Na usuai mai taitai ma sui o Matagaluega i totonu o le sinoti lea auā le faafeiloai ane o o latou faafeagaiga ma faletua i le aotelega o le mafutaga lenei a Matagaluega.
O faaaloaloga poo oo o faafeagaiga ia ua momoli ane
O auauna a le Atua ia ua faauuina mo le isi 6 o tausaga i o latou matagaluega foi i Apia nei ua aofia ai le Susuga Vaatofu Fiti ma lona faletua ia Falausi ua tofia nei e galulue i le Matagaluega a Setema Fou. O le Susuga Ropati Siaki ma lona faletua o Poseka ua tofia e galulue i le Matagaluega a Saina. O Selau Urima ma lona faletua o Kuini ua tofia e misionare i aulotu fou i Falelauniu.
O le Susuga Isaako Nuualalo ma lona faletua ia Urima ua tofia e pule i Autalavou a le Sinoti a Apia ma le Susuga ia Tuua ma lona faletua ia Hannah ua tofia nei e tausia fanua a le Ekalesia i Tuanaimato, lea foi o le a faamautu ai i totonu o le Sinoti lenei. E pei lava ona silafia o le toatele o faafeagaiga tausi nuu a le Ekalesia Metotisi e iai le umi lea e galulue ai i lea matagaluega ma lea matagaluega ona toe foi lava lea i le Koneferenisi, o iinā e sau ai le faaiuga o i latou e filifili mai e le Ekalesia e galulue i lea aulotu ma lea aulotu. O le tusi tofiga lea e ta‘ua ai e le Ekalesia Metotisi ana suiga tetele ia ma e tele lava i le taiono tausaga e auauna ai lea faafeagaiga ma lona faletua i lea aulotu ona siitia lea a lē o Samoa nei, e agai i isi atunuu o loo iai matagaluega poo aulotu a le Ekalesia Metotisi Samoa e pei o Amerika Samoa, Niu Sila, Ausetalia, Hawaii ma Amerika ma o se tasi lenei o ekalesia ua vaaia le maualuga o le numera o ana matagaluega.
O le tasi lenei o sinoti aupito toatele i totonu o Samoa atoa le Sinoti a Apia ua aofia ai aulotu poo matagaluega mai i le talafatai o le taualaga seia paia Falelauniu lea e lua matagaluega o le Metotisi ua faatuina ai.
