Ua faafaigaluega nei se kamupani mai Niu Sila e ta‘ua o le NZ movie e faia le galuega o le tuufaatasia ma faatino le faataatiaina o laina o fesootaiga mai le nofoaga autu o faasalalauga poo le media center agai i nofoaga o le a faia ai le fono a malo laiti o le lalolagi.
O le tamaitai pule sili ma le sooupu mo galuega o tapenaga mo lea fono tele le susuga Faalavaau Perina Sila, na ia faailoa mai lea tulaga ina ua fesiligia i le iai o ni faafitauli ua feagai ma galuega o le media center i le itu i galuega tau inisinia. Faaalia e Faalavaau Perina e leai se silafia tau inisinia o iai i le matagaluega o fesootaiga ma faamatalaga televavave mo lea itu o le galuega, o le pogai lea o le sailia loa o se kamupani mai fafo latou te faia. Ua talanoa mai ai foi ma le pule sili o galuega o tapenaga i le tāua o le pitolaau a le aufaasalalau i le lipotia ma le faasalalauina o taualumaga uma o le fono a malo laiti o le lalolagi ina ia silafia ai e atunuu uma mataupu o le a talanoaina aemaise o ni faaiuga o le a taunuu i ai.
O le naunautaiga o Faalavaau ia ogatasi tapenaga o fesootaiga ma faasalalauga o loo tapena ma le manaoga o Malo Aufaatasi ia le gata ia faasalalau le fonotaga i le lalolagi e aunoa ma se faaletonu ae ia malamalama tagata o atunuu taitasi i le latou lava gagana i mataupu o le fono e pei ona o le a faaaogā ai le au faaliliu upu poo translators.
A itiiti mai e silia i le selau afe tala Amerika o le a faaalu e le Malo mo le totogiina o le kamupani mai Niu Sila ua tapatapa i ai mo le faia o le galuega faainisinia mo faasalalauga e faapitoa lava i le maua o ata ma le leo aemaise o le tuuina atu o nei faasalalauga i luga o alāata tau televise ina ia salalau atu i le lalolagi. E lei manuia lava sailiga mo se faamatalaga mai le pule sili o le matagaluega o fesootaiga ma faamatalaga tekonolosi o loo taiulu i galuega o le media center e tusa o le faafitauli ua lē mafai ai ona faatino e alii inisinia o le matagaluega le faia o le pitolaau ua nafa ma le kamupani o le NZ Movies.
Auā e pei ona muai ta‘ua i se tasi o lipoti muamua atu, sa aliali mai ni faamatalaga ma ni molimau ua ta‘ua ai le tuai o galuega o le nofoaga tutotonu o faasalalauga poo le media center mo le fono a malo laiti o le lalolagi o le a faia ia Setema ma ua avea o se to‘a i tapenaga a le Malo i le sauni atu mo lea taligamalo tele. Na faaalia e ni molimau talitonuina, ua tuai nisi o gluega mo le nofoaga ona o le tuai faatino o galuega faainisinia i le lotoifale, o le nofoaga e pei o le tosoina o uaea o fesootaiga e fesootai ai le media center ma nofoaga autu o le a usuia ai lea fonotaga tele faavaomalo.
O le fatu lea o le fonotaga o le a talimalo ai le atunuu ona o taualumaga uma o mataupu o le a talanoaina o le a faasalalau tuusa‘o e faletelevise, o nusipepa ma leitio faapea upega tafa‘ilagi aemaise o luga o fesootaiga televavave faaonapo nei. Faaalia e se alii tusitala e galue i le Malo ua sailia nei e i latou o nafa ma tapenaga ni inisinia mai fafo e lava le silafia e faia le galuega ona ua tuai tele ma ua toso ai ma isi galuega e fesootai ma le tapenina o faletaalo i Tuanaimato o le a usuia ai le fonotaga.
Lea la e pei ona ua tapa ai nei le fesoasoani a lea kamupani mai Niu Sila.
