(Faatonuina e le Court of Appeal a Niu Sila i le vaiaso nei, se ulugalii papalagi e totogi le $3miliona mo se fale sa la ofa la te faatauina ae te‘i ua lē totogia le tupe o le Feagaiga)
O le mea tonu lava lea e ta‘ua i luga ua lavea ai se ulugalii papalagi lea na faatonu i le vaiaso nei e le Court of Appeal a Niu Sila e totogi le $3miliona i le ulgalii e ona le fale i le North Shore, sa la ofa e faatau i le $7miliona ae mulimuli ane ua uma ona fai le feagaiga¸ ua lē totogiina i tausaga e lua le tau o le fale lea e i luga o le feagaiga.
Na lē faatauina loa e le ulugalii le fale i le $7miliona, nonofo loa le ulugalii e ona le fale, toe faatau i isi tagata le fale i le tau e $4miliona.
Uma loa ave le tagi a le ulugalii e ona le fale e totogi mai e le ulugalii lea na ofa e faatau le fale i le $7miliona, le paleni i le va o le $7miliona ma le $4miliona le tau lea ua faatau ai le fale i le tagata lona lua.
E oo i expenses poo tau i le toe advertising o le fale ina ua lē faatauina e le ulugalii lea na ofa e faatau le fale i le $7miliona, ua faatonu foi e le Court of Appeal le ulugalii e totogi ma expenses poo tupe ua alu a le aiga e ona le fale, talu ai ona ua alu vale tupe a le aiga e ona le fale e toe taumafai e faatau le fale ma faasalalau, ona ua lē faamaoni le ulugalii muamua lea na ofa e faatau le fale i le $7miliona.
E tusa e $3miliona lenei o le a totgi e lenei ulugalii ae leai se mea o la maua, leai se fale. E telē le aoaiga e maua mai ai i lenei mataupu mo tatou tagata.
Atonu e lē oo ni tau o ni fale tatou te vaai e faatau i le $7miliona, ae o le lesona, ia saili muamua pe e te gafatia le tau o le fale, aumai se faamaoniga i le Bank e mafai ona maua le loan e faatau ai le fale, ma maua le deposit e totogi muamua, a o e lei sainia ni pepa, e te ioe o le a e faatauina se fale.
E te sainia loa se pepa, e lē toe iai lave se isi lafitaga mai le tulafono, aemaise o lenei ua aumai i le fale faamasino maualuga le Court of Appeal lenei faaiuga.
I lo‘u iloa faaloia e tusa pe ave le mataupu lenei i le Suprfeme Court, le fale faamasino sili ona maualuga i Niu Sila, e lē toe suiina le faaiuga a le Court of Appeal leaga o le feagaiga osia, e lē mafai e se itu e tasi ona tavete le feagaiga.
O le upu a le faamasino e faapea “documents follow money” o lona uiga a uma loa pepa ave le tupe.
Fai ma a‘oa‘oga lenei tulaga ua tulai mai. E leai se avanoa e tuuina e le tulafono i le faasamoa foi lea e uma ona sainia se feagaiga, ae mulimuli omai ma le faamolemole ua lē gafatia ona totogi, ona o se maliu poo se faalavelave faafuasei ua tupu mai.
Mo le silafia e latou e lē o silafia le faasologa o fale faamasino a Niu Sila nei, o le faasologa lenei o fale faamasino mai i le faamsinoga sili o Niu Sila i le fale faamasino maualalo:
1. Supreme Court 2. Court of Appeal
3. High Court 4. District Court.
Ia tautuana mai tatou uma o feagaiga uma e tatau lava ona malamalama i tusitusiga ninii ma upu uma o le feagaiga, ma saili pe e te gafatia ona faatupe le feagaiga, a o e lei sainia ni pepa.
