Faaee le suafa Tuipe’a ia Atonio

E auau le tavae i ona fulu, o fea foi e aumau ai e le galo lava le faasinomaga ma le tupuaga na soifua ma fofoa a’e ai le olaga o le tautua. O le ala i le pule o le tautua, o le mafuaaga lea e toesea a nuu potopoto ae nanau mai lava aiga ina ia faapale o latou tamafanau i suafa tāua o aiga ona o le tautua ua afu ma le tautua matavela. E nonofo i atunuu i fafo ae lē muta lava le tautuaina o aiga nuu ma ekalesia e oo mai lava i le taimi nei.

O le faaiuga o le tausaga ua mavae i le aso 27 o Tesema na faataunuuina ai le Saoimatau ma le faafotu o le vaaulu o le suafa Tuipe’a i Samata i Savaii. Sa matuā tumutumu le laoa o Tuipe’a o Maota ina ua nofoia tia sa i le afio o le Sa’o o Toomata o le Taofia a Malietoa Taulapapa ma le toafa o alii, a’o le soosootuli a Saleutogipo’e na matua i Falealupo tofiga aemaise o le usualele i le itumalo ma le usoga a Tumua ma Pule. O ‘ava o le alii taeao o le nuu ma malo na fetalai ava iai Asiava Oka Lokeni. O ‘ava o nofo sa folafolaina lea e le tofa ia So’e Solofa. I le faatau a Saleutogipo’e na tasi ai ia Leutogi Pula Sikaleti ma o ia lea sa faapaiaina le saoimatau ae inu malie le ‘ava a Toomata i lana faamanuiaga i nofo. Ona alo ai lea o le matua ia Tuipe’a Eliu Eliu o loo faasa’osa’o i le aiga i faaaloaloga masani o le aso.

E toasefulu i latou na faaee iai le suafa Tuipe’a, faatasi ma isi na suafa ia Malagamalii, o le suafa Asiava, Faaalii ma le Tafeamalii.

O Tuipe’a o le matua lea o Saleutogipo’e, e pola puipui auā le sao o Toomata ma le toafa o alii ma le nuu o Samata.

O i latou na faaee iai le suafa Tuipe’a, o Kolose Tuipe’a Finau, Arona Eliu, I’atapa Eliu, Sape Eliu, Peter Tuipe’a Eliu, Fautua Tuipe’a Mose, Peni Tuipe’a Mika, Falaniko Ulimasao Tuato, Matailiili Faamate ma Atonio Tuipe’a Makalio. O le suafa Malagamalii na faasuafa ai Lisa Safiu, Simanu’a Faamate, Maletino Falekuata, Vitale Mika, Kilapoe Sherpherd, Malaki Mika, Caleb Finau ma Kolose Jr Laufiso.

Suafa Asiava na faaee atu lea ia Setu Seth Finau, Luapi Sopo, Telea Faasavalu, Pouniu Masoe ma Uaealesi Pene Amituanai.

Suafa Tafeamalii na suafa ai Felauai Fiaalii, Suitama James Finau, Benjamin Peni Finau ma Finau Bob Finau.

Suafa Faaalii na matai ai Setu Finau, Tauinaola Laki ma Sanele Mika.

O le malaga mamao atu o nisi o aiga i fafo i lenei faamoemoe na molimauina ai le tāua o le apoapo ma tausisi i measina a aiga ma nuu aemaise lava i suafa o aiga. O le tagata ma lona faasinomaga o le tagata foi ma lona tupuaga. O le aiga o le tofi lea mai le Atua.

O le tofa ia Asiava Atonio o se tasi o tamalii o loo faiaogaina le gagana Samoa i totonu o aoga, ma autalavou faatasi ai ma polokalame o le vao filifili o Samoa i luga o le Radio Samoa i po o Aso Lua o vaiaso taitasi.