O se lagona fiafia tele sa oo ane i le tamaitai o Theresa Maree Unasa ina ua mae‘a ona faataunuuina se tasi o manaoga sa faananau i ai lona loto, a o tuputupu ae o ia i totonu o lona aiga, aemaise ai o ia foi o se tamaitai Samoa.
O ni tala sa tuutaliga mai e tuaa ua fai lagi le folauga, ma ua tofafa mai tiasā, ua avea e pei o ni tala faafagogo logo malie i le loto ma lagona, ma ua avea foi o se miti ua avaga i ai le mafaufau i taimi uma.
E tusa lava foi poo a nisi mau mea faafiafia e agai mai ma faatosina mai i le savaliga ma le olaga faale teine muli, ae peitai ua pei lava o se afi ua le mateia, le totogo ae pea o le lagona fia pai i ai, ma le fia taulimaina o le manaoga ua leva ona faananau iai.
O le taina o le malu a se tamaitai e le faigofie pe a vaaia i ai i lona tulaga o loo faatulagaina ai e le atunuu, i ana tu ma ana aganuu.
Ae a liliu foi i le itu faa-Kerisiano, o le tasi foi lea vaega taligata, aua e iai ona foi tulaga maaleale e ono fuatia ai, soo se tamaitai lava o le a faaee i ai le lagi malofie poo le malu.
E ui lava i ia tulaga uma, ae peitai sa le suia ai le lagona o lea foi alo o le atunuu, i lona faananau pea i lea laei a le atunuu, e pei ona faamauina i tala o le vavau.
E pei ona taua i luga, masalo o le tele o taimi e faamatalatalaina ai e tuaa o le tamaitai le tulaga i le malu a se taupou tamaitai, o le tele foi lea o le faatuputupulaia o le manao ma le tuinanau i ai o le loto o le tamaitai o Theresa.
O le 21 o tausaga o i le tausaga nei, sa faataunuu ai loa ma le manaoga sa tulitulimatai pea ma naunau i ai, e ala lea i le taina o le malu.
E tusa ai ma se tautinoga a le tamaitai, o le mafuaaga na manao ai e ta le malu, peitai sa toe fesiligia pea e le tataou nusipepa, pe iai nisi o lona aiga sa avea ma taupou, ae pe sa ausia foi lea tulaga, o le taina o le malu.
Sa tali le tamaitai, ioe sa faalogo i ai i le uso o lona tina, sa avea ma taupou o le latou afioaga i Siufaga i Savaii, peitai ua tuua e le uso lea o lona tina lona tulaga sa iai, ina ua filifilia ma avea ma faletua o se faifeau o le ekalesia AOG, ma o loo galulue ai pea mo le Atua ma lona finagalo, e oo mai i le taimi nei.
Sa faapea foi ona faamaonia mai e le tina o le tamaitai o loo faatalanoaina, lea tulaga.
O se tasi tulaga tāua tele sa maitauina e le tatou nusipepa, ona o se faamatalaga a lea lava tamaitai, sa taua ai, o le isi ona naunautaiga sa mafua ai ona ta lana malu, ona e manao ia faaauau pea ma aua ne‘i motusia lea vaega tāua o tu ma aga faa-Samoa, ia le gata i totonu o lona lava aiga, a ia faapea foi lana augatupulaga i totonu o le atunuu.
Sa aliali mai i le saunoaga a Theresa, o loo iai lona agaga i le taofimauina o measina a le atunuu, aemaise ai o loo soifua ma ola i atunuu ese, e pei o Niu Sila, o loo nofo ai, aemaise foi Ausetalia, e masani ona asiasi i ai, ma o loo nofo ai lona uso matua sa taina faatasi a la malu, ma o loo silasila i ai i le ata.
Sa taua foi e Theresa, o lona matua ia Tooa, sa soaina le taina o lana malu, ma ua malaga atu nei ma faamautu i Ausetali ma lona aiga.
O le susuga ia Sua Pita Suluape, o le matua o faiva sa faafoeina le galuega, ma sa faia lava i Samoa i le aso 5 o le masina o Ianuari o le tausaga nei lava.
Aoaoga/Galuega
Sa mae‘a le aoga a le tamaitai o Theresa Maree Unasa i le aoga maualuga a Onehunga, i le 17 o ona tausaga.
Sa ia filifili e toe faaauau pea lona soifua aoaoina mo lona faamoemoe i se galuega lelei mo ia i le lumanai.
Sa toe ulufale ai i aoaoga a le Best Training, ma aoaoina le mataupu tau pisinisi, atoa ai ma galuega i totonu o ofisa.
Sa faaiuina lona taumafai ma galue i se tasi o kamupani i le malae vaalele i Aukilani, i le tulaga o felauaiga o uta ma faamomoli i totonu o Niu Sila ma fafo atu.
Sa toe suia lana galuega ma agai ai faigaluega i le kamupani telefoni a le Vodafone i le itu tau fefaatauaiga, ma le va fealoai ma tagata lautele.
O le taimi nei ua toe suia foi lona manaoga a o iai pea i le malosi e mafai ai ona filifili tatau mo se lumanai.
O loo ua tausaga lua i le Iunivesite a Aukilani, ma o loo taumafai lona faailoga o le Bachelor in Education, ma le faamoemoe e fia faiaoga mo aoga maualalalo (primary school).
Sa taua e lea foi alo o le atunuu, o loo iai lava foi lona naunautaiga, e fia faaaoga lona tomai mo alo ma fanau a Samoa o loo i le atunuu mo le lumanai, pe afai ae iai se fuafuaga a ona matua e toe taliu i le atunuu, mo le taimi e malolo litaea ai.
O matua o Theresa o le afioga ia Unasa Teofilo Muliagatele mai Savaia Lefaga, a o lona tina o Taeario Tuilua Unasa, e mai le afioaga o Nofoalii, Saleimoa, ma Siufaga i le motu tele i Salafai.
