O se aso matagofie i ona vaaiga eseeese, le Aso Sa talu ai, aso 27 o Me 2012, lea na aloaia ai le tuufaatasia o ekalesia e lua a le Assembly of God a Glen Innes ma Onehunga, ma ua avea ai nei ma ekalesia e tasi i totonu o Onehunga.
O le sauniga lava foi lea ua aloaia ai ma le faaee atu o le faaauauina o le galuega faafaifeau i le Susuga Toomata Sione ma lona faletua ia Sieni, lea sa faifeau i Glen Innes.
O le Susuga Taeleipu Moananu ma lona faletua ia Meafua Moananu, o laua ia sa galulue i le ekalesia i Onehunga, ma ua faasee tuagalu nei i laua, ona o nisi o valaau a le Atua i le galuega, e ala lea i le toe faaauauina o aoaoga, mo nisi o faailoga e tau le afioga a le Atua, faatasi ai ma le toe faatuina o se isi ekalesia i Ausetalia.
O le susuga ia Taeleipu ma lona faletua, o i laua sa faavaeina le lotu i Onehunga, ma ua ova nei ma le 20 tausaga talu ona faatuina le ekalesia, lea e taitaia e le susuga i le Taitai Aoao o le Assembly of God i le lalolagi, le Susuga Iliafi Esera.
