O le afioga Muliagatele Filomena Nelson, o le tamaitai muamua lea o Samoa ua faaeaina i se faailoga ua ia maua e amanaia ai lona sao i le Pasefika i le unaia o taumafaiga e faalauiloa faiga gaioiga mo le tali atu i taimi o faalavelave faafuasei faalenatura poo natural disaster.
E pei ona silafia o lea tamaitai o le atunuu o loo avea ma Pule sili lagolago o le vaega o galuega faatino e laveai ai le soifua o tagata ma meatotino mai taimi e tutupu ai ni faalavelave faalenatura (Assistant CEO, DMO) i Samoa , ma o lona faailoga na tauaaoina i se sauniga na faia i Fiti i le amataga o le masina nei, ina ua faia se faatasiga e faailoa ai taumafaiga ua oo i ai galuega laveai ma galuega fesoasoani i taimi o faalavelave tutupu faafuasei faalenatura i atunuu eseese o le Pasefika.
O le faailoga foi lenei ua avea ma faamanatu i le atoaga o le sefulu tausaga o galuega faapenei e pei ona faatāua e Malo Aufaatasi.
