O le tausaga ua mavae na faavaeina ai pe sa tatala aloaia ai se auaunaga fou a le matagaluega o leoleo ua faaigoaina o le Pacific Strategy, poo le Taeao Fou. Ua iai le latou lava komiti ua na’o tagata Pasefika ua latou tusitusia ni fuafuaga e taiala ai galuega a leoleo aemaise o fesootaiga ma tagata Pasefika.
E tolu vaega tāua o lea faamoemoe o le Taeao Fou. (1) Ia galulue i se tulaga vavalalata soosoo tau’au ma tagata Pasefika iinei i Nii Sila, ina ia fesoasoani atu ma talia fautuaga o loo tuuina atu ia latou. (2) Ia tele ni tagata leoleo o le Pasefika ia latou umia ni tofiga maualuluga a le matagaluega. (3) Ia iai ni pine faamau e faamaonia ai taiala nei ua fuafuaina e le Taeao Fou auā le manuia o tagata lautele aemaise lava o le Pasefika.
O le siitia ai o le auaunaga a lea tamalii o le atunuu le tofa ia Fata Willie Fanene e avea ma National Pacific Advisor o se faaeaea lea i alo ma fanau uma o le Pasefika aemaise lava ia Samoa o loo galulue i totonu o le matagaluega. O le avanoa mo le tofa ia Fata Willie Fanene i totonu o le matagaluega a leoleo e avea ai ma faufautua o auaunaga a le ofisa o leoleo ina ia momoli i ai se lagona e fai ma sui o tagata Pasefika e faatonutonu ai le faatinoina o galuega, o ia foi lea o lea a avea ma tagata e autu i ai mataupu uma tau i le Pasefika.
O le Aso Faraile na usu faaaloalo ai le komiuniti a le Pasefika e patipatia ai le tulaga maualuga ua siitia i ai le saili malo a le susuga ia Fata Willie Fanene i totonu o le matagaluega o leoleo. O lea faamoemoe sa faataunuuina lea i le maota o Samoa i Magele, sa auai le afioga i le Konesula o Samoa ia Faolotoi Reupena Pogi, o le Minisita o tagata atu motu o le Pasefika ia Aupito Toesulusulu Su’a William Sio, o le taitaifono o le Local Board a Magele ma Otahuhu ia Lemauga Lydia Sosene ma le faalapotopotoga o le Samoa Atia’e.
Na faatasi atu ai foi le susuga ia Aliimuamua ma Faamoetauloa Jerome Mika o nisi ia o sui o le komiti lea sa faufautuaina ma galulue soosoo tau’au ma leoleo ina ia faamautu le Taeao Fou (Strategy) mo tagata Pasefika. O le afioga i le konesula sa fai ma sui o le komiuniti e lauga i lea aso ae o alo ma tamafanau o Samoa o loo galulue i totonu o le matagaluega a leoleo sa latou faatinoina le ‘ava o le feiloaiga. O le matagofie ma le maualuga o le aso ona sa auai atu i ai nisi o sui maualuluga o le matagaluega o leoleo latou te molimauina le faaaloalo a Samoa i ana tamafanau e ala i lana aganuu faa-Samoa. Sa momoli foi le faafetai a le tofa ia Fata Willie Fanene i le matagaluega o leoleo ona o lenei tofiga ua ia tauaveina auā se manuia o tagata lautele ma le Pasefika aemaise ai o lana faafetai i le komiuniti a le Pasefika aemaise o Samoa ona o lenei faaaloalo ua feiloai ai ma patipatia le tulaga o lana auaunaga i le atunuu.
