Faaeaina Lale Ieremia tulaga maualuga

E iai le upu ua masani ai le atunuu o Samoa, ‘Se ua ta fia Falealili fua’. Pe leai se sootaga i toto ma aano sei tulou, ae taua loa o se Samoa e faafuasei lava le agaga mitamita ma le fia sootaga atu i ai.
O lagona ia ina ua faamanuiaina foi se tasi o tamalii Samoa le susuga Lale Ieremia e pei ona ua avea ai nei o ia ma Taitaifono o le Fono Faatonu a le kamupani ua faaigoaina o le Arrow International.
O lenei kamupani ua atoa nei le 25 o tausaga talu ona faavaeina.
O le tausaga 1999 sa uluai ulufale atu ai le susuga Lale Ieremia ma avea ai o ia o se faauluuluga o lenei kamupani ma i lea lava tausaga sa siitia ai le tau aofai o lenei kamupani i le tasi piliona.
Na taua e le susuga Ron Anderson, o ia lea na faavaeina lenei kamupani masalo o le a vaaia ma puleaina foi e lenei tamalii Samoa se tasi o galuega tele lea o le a faataunuuina e ala i le fausiaina o le malae taalo tele, le Forsyth Barr Stadium i le University Plaza i Dunedin, lea e tusa lona tau aofai ma le selau valusefuluvalu miliona tala.