Faaeaina Lale Ieremia tulaga maualuga

O upu a le atunuu e faaleo ai se agaga talisapaia ina ua tau lau o se faamoemoe sa tapuaia: “Ua malo fai o le faiva.” Ae ua moni ma faamaoni le molimau a le faisalamo: ‘O lē na lulu saito ma loimata, e selesele mai ma le alaga fiafia.’

Ua faapena lagona ua tofo suamalie nei i ai se tasi o alo o le atunuu, le susuga ia Lale Ieremia, ina ua faaeaina i se tofiga maualuga i tulaga tau galuega o loo galue ai i Niu Sila nei.

Soifuaga:

O matua poo tuaa o Lale Ieremia, o Samoa uma, o le tamā ia Siufaitotoa Aumua Sia Simanu Ieremia mai le afioaga o Matautu Falealili ma Vaiee, a o le tinā ia Kiona Ieremia mai le afioaga o Lepea i Faleata.

O Lale o se tasi o le fanau e toafa, e toalua ona tuafafine matutua, o Peaario ma Soteria ma lona uso laititi o Neil. E sootaga atu foi le alii o Lale i ona tauusoga muamua le alii e iloa tele i le taaloga lakapi, o Alama Ieremia, o sui tuai o le Manu Samoa ma le All Blacks i tausaga ua mavae.

E faapena foi ona fesootai atu i le tamaitai faasalalau i luga o le televise, o April Ieremia. Ua faaipoipo atu o ia i se tamaitai Rarotonga Palagi ma e toafa o la alo, e toatolu teine ma le tama e toatasi.

Na tuua Samoa e lenei aiga ae malaga mai i Niu Sila ma le faamoemoe e saili manuia, e le gata i aoaoga mo i laua lava, ae sa silasila foi mo se lumanai manuia o o la alo.

O le tulai mai la o le susuga ia Lale Ieremia o se alo faasino ia Simanu ma Kiona Ieremia, o le tasi lea o taunuuga o se moemitiga sa naunau i ai matua mai tausaga e tele ua mavae.

Sa muai faamautu lenei aiga i Petone i Ueligitone i nisi foi o tauaiga. Na mulimuli ane maua se nofoaga mautu i Porirua ma nonofo ai loa ina ua mafai ona mautu mea uma.

Na fanau ma soifua ae Lale i Lower Hutt i Ueligitone lava, ae sa toe taliu atu i Samoa i taimi o lona laititi faapea foi i le taimi o galuega. I lea lava taimi sa fesoasoani atu foi Lale i ni galuega tetele sa fuafuaina i lea vaitaimi.

A o iai i Samoa sa talosagaina e lona uncle poo le uso o lona tama, o se faafeagaiga o le ekalesia LMS le susuga ia Rev Lale Ieremia, ina ia fesoasoani ane i se fuafuaga a le ekalesia o loo tau faatuina i totonu o le aoga faafaifeau i Malua.

Aoaoga:

Sa aoaoina Lale i le aoga Marearoa Primary, sosoo ai le aoga a Brandon Intermediate, ae faaiu i le kolisi a Porirua ma sa faamanuia ai foi i le tulaga taitaiulu mo tama aoga, poo le Headboy. Na ia filifilia le Fine Arts School e taulai i ai le faaauauina o lona taumafai i le taleni mo galuega faapea.

Galuega:

I lona naunau e fia maua se seleni aua le faatupeina o lona manaoga e fia ulufale atu i le iunivesite mo le faalauteleina o lea tomai i galuega tau faugafale, sa ia talosagaina ai le kamupani faufale a le Fletcher mo se galuega.

E na o le lua vaiaso na galue ai mo le Fletcher ae tuuina ane loa ia te ia se avanoa i le tulaga o se faauluuluga i le vaega o faugafale, talu ai sa ia te ia lea agavaa faapitoa atoa ai ma se isi foi agavaa faapitoa i le tulaga tau i sailiiliga, (survey) NZCB.

O lona soifua galue i totonu o lea kamupani na mautinoa ai, o ia o se uluai tagata Samoa ua ia ausia lea tulaga maualuga.

Na faaiuina le taumafai o lenei alo o le atunuu i tulaga uma sa ia naunau i ai, ona sosoo ai lea ma se galuega sa la toalua ai ma lona faiaoga o le fuafuaina ma fausia se vaa e tusa ma le 14.5 futu le umi, e faaogaina ai mea faaneionapo.

Tofiga i Galuega

E ono tausaga sa galue ai mo Fletcher a o lei malaga ese atu ma Niu Sila, ma toe foi mai ma galue mo se tasi foi o kamupani tele i le atunuu, le Mainzeal Property & Construction, ma ia taitaia ai loa se tasi o galuega tele e pei o le vaaia ma fausia o se galuega tele ua faaigoaina o le North City Plaza i Porirua.

Na sailia e le kamupani o le Arrow Head le susuga ia Lale na te taitaia pe faauluulu i ai se tasi foi o fuafuaga tele i le itumalo o Waikato, atoa ai ma se isi galuega tele i Hemilitone mo le fausiaina o le Casino i le tuanai ai o tausaga e sefulu, ma o le mafuaaga lea o le liliu mai o lona aiga ma faamautu ai loa i Hemilitone e oo mai i le asō.

O Lale o se alii Samoa muamua ua ia pulea ni galuega tetele e tusa lona tau ma le tasi le piliona tala, ma faamauina ai o se alii pule o le tausaga, a le NZIOB mo le silia i le 50 miliona tala.

Ua tofia nei Lale i se tasi o tofiga maualuga o se alii faatonu o le Arrow International.

O se agavaa faapitoa ua umia nei e lea alo o Samoa ua tofia ai nei e le Arrow, o se faatonusili e faauluulu i ai se tasi o galuega tele o loo fuafuaina nei, o le fausia lea o le nofoaga fou le Forsyth Barr Stadium, ua fuafua e sui tulaga i le Carisbrook.

O le tau aofai o le galuega tele lenei ua amata ona faagaioia, e tusa ma le $188 miliona, lea e faaagaga mo le taamilosaga o le Ipu o le Lalolagi 2011 i le taaloga lakapi, ma ua fuafuaina e tatau ona  maea a o lei oo i lea taimi fuafuaina.

E pei ona silafia o se malae taalo muamua lea i Niu Sila ma le lalolagi atoa o le a fai sona taualuga tumau, pe o le a pupuni tumau lona taualuga, (fixed roof).

O se isi galuega ua fuafuaina o se vaega o le fuafuaga tele ma o le a i lalo lava o le pulega ma le taitaiga a lea alo o Samoa, e aofia ai se malae taalo a le Iunivesite a Otago e tusa lona tau ma le $50 miliona tala.