O le vaitau foi lenei o seleselega a fanau mai a latou faailoga sa galulue mamafa ai ma finauina i le tele o suesuega a o faagasolo tausaga.
Ma o le iunivesite a le AUT sa faia faapitoa se sauniga e faalauiloa aloaia ai nisi o fanau a le Pasefika ua iu manuia ma maua o latou faailoga, e tusa o tomai sa aotauina ai i lea foi iunivesite i Niu Sila.
O le AUT o loo pito toatele fanau a le Pasefika o loo aooga ai, ma e lona tolu tutusa ma fanau a Maori o loo iai ai, ae o loo lē lava faiaoga i totonu o le AUT mo le faafetaiaia o manaoga o nei fanau Pasefika a o aotauina ai.
O le ala lea o le faatāuaina o nisi o polokalame sikolasipi a le iunivesite ina ia aoao ai fanau ia tulai mai i ni tomai maualuluga e ono toe faaaogā i se taimi mulimuli ane, e avea ai o ni faiaoga e aoaoina fanau Pasefika o loo fai mai le iunivesite.
E eseese lava faailoga na faamanuiaina ai nisi o alo o le Pasefika e pei ona iai le faauuga i le tausaga lenei 2012. O le tamaitai Samoa o Rosalina Meni sa faauu mai lona faailoga i mataupu tau suesuega o soligatulafono (criminology).
O le tausaga lona 3 lea o Rosalina i le sailia o lona faailoga i le AUT, ae ese mai ai foi isi alo o le Pasefika i o latou foi tomai na aoaoina ai.
O se tasi o saunoaga autū i le sauniga i lea afiafi mo le aloaia o tomai maualuluga o fanau Pasefika, o le faletua ia Professor Peggy Fairbairn-Dunlop, o ia o le Foundation Professor mo Suesuega tau Pasefika i le Iunivesite AUT.
