Ua faalauiloa suafa o sui o le Iunivesite Aoao o Samoa ua faamanuiaina i uluai sikolasipi ua maua mai i lalo o se polokalame ua faatupe e le Iuni a Europa mo tagata aoaoina o le atu Karepeane ma atumotu o le Pasefika.
O Samoa i lalo o lana Iunivesite ua faamautu fesootaiga ma Iunivesite o le Karepeane ma ua faapea ona ave i ai latou ua maualuluga a latou taumafaiga i aoaoga eseese.
O le autu o lenei polokalame ina ia mafai ona fesoasoai le Iuni a Europa i le atina’e o tomai eseese mo i latou i totonu o atumotu nei e tau o atumotu laiti poo malo e laititi tamaoaiga.
O le unai la e le gata o le a maua ai aoaoga maualuluga i le tikeri o le Masters ma le PHD ae ia mafai ona iai le fesootaiga lenei i le tafatolu o tagata i Malo o Europa, i latou i le atu Karepeane aemaise i latou i le Pasefika nei.
O se laasaga maualuga tele lenei i le itu tau i avanoa faa le aoaoga aemaise i le maualuga lea o suesuega ma o le uluai taimi lenei ua faatino ai lea faamoemoe.
O le taumafaiga la lenei ua amata i le agai atu o sui o Samoa i Iunivesite o le atu Karepeane ae o loo faatali foi i latou o loo i ia atunuu e manumalo i nei avanoa e agai mai i Samoa ma isi atunuu o le Pasefika.
O le sikolasipi ua totogi ai pasese o femalagaaiga a i latou e maua avanoa sikolasipi, o tupe e totogi ai nofoaga e faamautu ai mo le faamaea o ia aoaoga atoa ai ma le tupe e ola ai i le taimi atoa o aoaoga nei. O loo tatala foi ma le avanoa e maua ai sikolasipi a i latou e galulue i totonu o le Iunivesite Aoao a Samoa.
O i latou la ua faamanuiaina ua aofia ai Faafetai Kolose o le a saili le tikeri o le Masters i le Iunivesite o Belize – o Faafetai Kolosi o le a faaauau ana suesuega o le Masters foi i le Iunivesite o le Pasefika i Saute.
O Felila Saufo‘i Amituanai o le Iunivesite o le West Indies ma o le Masters Degree foi ua maua ai lana sikolasipi, o Rossanna Maula o le a saili foi lana Masters Degree i le Iunivesite o le West Indies ma o le Iunivesite lava lea o le a saili ai le Ph.D a le tamaitai o Epenesa Esera.
O Su‘a Iosefo Palesoo ua manumalo i le sikolasipi e ausia ai lana Masters Degree i le Iunivesite o Porto. O loo talia la i le taimi lenei i latou ua maua le avanoa e agai mai ai i lenei itu o le lalolagi auā le faamoemoe lava lea e tasi o le saili ai o faailoga maualuluga e faatatau i aoaoga o le Pasefika i totonu o atumotu o le itulagi.
Ua tatala mai foi le avanoa i le taimi lenei mo i latou e lelei i mataupu faasaienisi ma le tomai i le itu tau i faatoaga mo sikolasipi e saili ai foi Masters ma PhDs i ia tomai, ma ua faalauiloa nei soo se tasi i Samoa e iai le manaoga e faalautele o latou tomai o iai i ia mataupu.
