O le vaiaso na tea nei na aapa ai foi le Faalapotopotoga o Malosiaga tau Eletise le EPC i le aao o le tulafono auā le faamalosia lava o lana taumafaiga ina ia faasolo ia le faaola o le afioaga o Magiagi i le mita lea e totogi muamua poo le cash power.
O le laasaga fou o lea mataupu o lea lava e tusa ma le 3/4 o le afioaga e lei toe ola lava se eletise talu mai le afā o Eveni.
O le mafuaaga ona o lea ua iai le faatonuga a le EPC seiloga lava ua malilie aiga nei e totogi le cash power ona faatoa mafai lea ona toe faaola atu i ai le auaunaga a le EPC.
O le aso ananafi na tulai ai sui o le afioaga ua i luma o le Faamasinoga ina ua fai le tagi a le EPC faapea ua o latou uia auala solitulafono ma toe faaola atu le eletise i nisi o maota o le nuu.
O aiga ia ua agai toe faaola o latou fale na logo lava i ai e le au tosolaina a le EPC e lē mafai ona faaola o latou moli seiloga ua totogi le cash power ma ua aveese vaega o le fesootaiga o laina eletise e mafai ona faaola ai o latou moli.
Na faapea ona agai nisi o nei aiga ma toe faatau mai vaega o laina eletise nei na aveese e le EPC ma toe faapipii i laina eletise nei ma mafai ai loa ona faaola le eletise i o latou fale. O lea la na suesue loa e Leoleo poo ai aiga ia ua agai lava i latou toe faaola atu eletise i o latou maota a o lea ua mae‘a ona logo i ai e lē toe faaola atu le eletise.
Ua molia ai nei la nisi o le afioaga ma o le vaiaso na tea nei na la‘u uma lava sui o le komiti a le afioaga lea e faatino feutagaiga o lenei mataupu e oo mai i le taimi lenei.
O le faamatalaga a le komiti a le afioaga, e lē o mautinoa poo ā tonu lava moliaga nei ua tuua‘ia ai sui o le afioaga auā a tuu i le tulafono. O le EPC na solitulafono, e fai o le lē savali i feutagaiga ia ua faagasolo, ae oo mai i le taimi lenei e lei tino mai lava folafolaga faalauiloa mo taui o le nuu a o lei amata le cash power.
Ae o lea foi ua faaaogā le afā e avea ma auala e faamalosia ai le faapipii o le cash power, ae o le motusia foi o le eletise e pei ona vaai i Magiagi ua manino o le EPC lava na aveesea vaega nei o laina eletise na lē mafai ai ona toe ola le eletise i ia nofoaga.
O aiga la ia ua toe faaola o latou fale, na faatau mai fuses nei ma toe faaola atu ai le eletise. O le faaleaga la o meatotino a le EPC e pei ona ta‘ua e le EPC o le galuega lea na fai lava e le EPC. O nisi aiga na totogi sa‘o lava tupe i le au tosolaina eletise ma toe faaola atu ai le latou eletise.
O lea lava e faatali taui o fanua o le nuu na faapea ona faaaogā mo le 92 lenei o tausaga e le Malo e aunoa ma se taui ma o le laasaga lena o loo tālia e le afioaga e pei ona ta‘ua e sui o le Komiti ona faatoa mafai ai loa lea ona malilie atoa le afioaga e amata ona ola i le cash power.
O loo faatali foi le afioaga i le aitalafu ua mae‘a ona faalele e tusa ma le $10miliona tala Amerika i le mu fua o le eletise mo le 15 o tausaga.
“E oo mai i le taimi lenei e lei maioio mai lava le pili a le aiga e tatau ona totogi, ua na o se faatustusa lea e aumai ma ave i le faamasinoga faatusatusaga ae leai ni numera mautu. O le la lava e iloa lelei e le EPC e lē talia e le faaamasinoga ia ituaiga matematega, auā o le tulafono lava ia a iai se masalosaloga i numera nei e lē talia ia ituaiga tuua‘iga.
“Ae ua faaleaga faafia lenei nuu i Samoa ma atunuu mamao, ua lau le aiafu, lau le nofo aitalafu, ae faafefea aitalafu ua savali i le 93 tausaga e aitalafu ai le Malo ia Magiagi. E lei pisa lava lenei nuu ae o lea ua amata loa ona pisa ona ua tele le mau faamatalaga faalele ae e lē o iai lava la ni faamaoniga o nei fuainumera e lafo solo,” o se faamatalaga lea a le tofi o le afioaga le afioga ia Tuiono Uini Keni.
Faaalia foi e le tofi o loo tumau le finauga a le afioaga ae ua amata foi ona vaaia le eseese o finagalo ona ua lē lavā e le toatele o aiga tatali le leai pea o se eletise mo le tusa i le lua masina. Ua ave pea le faamalosi a le nuu i aiga nei e onosai se‘i mae‘a lava feutagaiga o loo taatia ma le malo.
O le feiloaiga ma le alii Minisita o le EPC, Manu‘alesagalala Enokati Posala na tali ane ai le alii Minisita e leai lava ma nisi faamatalaga e toe faia, na o le faapipii lava o le cash power ma sauni aiga Magiagi e totogi le cash power ma e tatau lava i tagatānuu o soo se afioaga o Samoa ona usitai i taitai o le Malo ua tofia e le atunuu e taitaia ona tagata.
Ua savalia i le vaiaso lenei e le afioaga se tasi o kamupani loia i Apia e amata ai loa sauniuniga o le ave o le mataupu lenei i le tulafono pe a leai lava se tali e maua mai i le malo a o faaauau ai le faamalosia e le EPC o auala ina ia faapipii ai le cash power.
E faatautaia le fono a le afioaga o Magiagi ae vaaia le agai atu o taavale a le EPC e faaauau ona faapipii le cashpower ma na toe agai ese ina ua mae‘a talanoaga ma le nuu i le faaiuga o le vaiaso na tea nei.
