Ua toe faasa‘o e le Kapeneta le faaiuga na faia muamua i le faaopoopoina o le taimi o suesuega a le komisi suesue ma le faamalolo lē tumau o le Komesina o leoleo ma se tasi o komesina lagolago, lea ua toe tuu atu i le amataga o Mati le umi o le faamalologa lē tumau, ae o le faaiuga o le masina fou e tatau ona tuuina atu ai le lipoti a le komisi suesue.
Ua faailoa mai e le tamaitai loia sinia o loo faufautua i le komisi o Sine Lafaialii Koria, o le talosaga a le komisi suesue na faia e faaopoopo ai le taimi o a latou galuega o le faaiuga o Fepuari ae lē o Ianuari lea ua toe faasa‘o i se isi pepa o faaiuga a le Kapeneta na tuuina atu i le matagaluega o leoleo i le Aso Faraile ua mavae. O le lavelave ma le tele o molimau na tuuina atu i le komisi le mafuaaga o le talosagaina o se taimi faaopoopo.
O le faaiuga a le Kapeneta ua aiaia ai foi o le lua masina lea na tauave ai le tulaga sui komesina e se tasi o komesina lagolago le susuga Nafoi Talaimanu Keti, o le a faamuta i le Aso Lulu nei aso 22 o Ianuari, ona faaauau lea e se tasi o komesina lagolago le tulaga sui komesina seia oo ina mae‘a le faaopoopoga o le taimi o loo faamalolo lē tumau ai le Komesina o le matagaluega i le aso 2 o Mati.
