Ua savalia nei le tolu o CD o le tautua ma le faalauiloaina o le taleni a le susuga ia Tuilavasii Tom Aiono.
O le taleni a Tom e pei ona ia saunoa i ai, ua leva ma o se meaalofa a le Atua sa tuuina i lona foi soifua a o laititi ma avea ma tama talavou. Peitai e lei leva ona ia faatinoina i le tulaga o le taumafai lea e tuufaatasi i CD mo le maketiina.
O le avea o le taleni musika ma pese a le susuga ia Tom, ua avea nei o se tasi o ana moemitiga mo lona soifua i lenei vaitaimi.
E lē gata i lea, a o se taleni ua amata ona liliuina o se ala manuia mo ia ma le aiga i le itu tau tamaoaiga, mo le tausia o ia lava ma lona aiga.
E talu ona amataina le tuufaatasia o pese ma faatauina i le maketi, ua o se ata ma se faailoga vaaia lea o le faaolaolaina pea ma le alualu i luma o le tomai ma agavaa i le taleni pese.
O le tele o fatuga a Tom, o loo faaaogāina tele e le galuega faasalalau a leitio, ma o le isi lea o faamaoniga o le manaomia ma le naunau i ai o le mamalu o le atunuu i le fia faafofoga i ai.
E oo lava foi i le tauvaga ma le polokalame a le Fale Televise a Maori, le Homai Pakipaki, sa auai foi ma maua ai le avanoa o Tom, e saga faailoa ai le taleni.
O le tele o ana fatuga ma pese e fai lava foi ma tuufaatasia e ia lava, ma e fiafia tele i uiga o pese mo le autalavou ma le tupulaga i luga a‘e.
O le po o le Aso Toonai na tea nei, sa faalauiloa ai foi le isi ana CD pese. O le igoa o le CD, “I Love You” (Ou te Alofa ia te Oe). O le molimau a le sui o le Samoa Times sa faatasi atu i ai, sa faailoa ai le tumu ma le toatele o i latou sa auai ma molimauina le faamoemoe.
O le CD lona tolu ai lea a le susuga i le alii pese talu ona fiafia e tusi pese ma faalauiloa faalauaitele.
Ua avanoa foi lea tautua mo le faatauina i luga o le maketi, mo soo se tasi e fiafia i ai. E mafai foi ona faafesootai Tom poo lona faletua, Salome Aiono i le telefoni: 579-6597 pe moomia le faatauina o se CD pese.
O le Apia Way i Magele sa faataunuuina ai le faamoemoe o le alii pese i le faaiuga o le vaiaso talu ai. Sa molimauina foi le matagofie tele o lea afiafi ona o le mālie o le siufofoga o le alii pese, aemaise ai o isi vaega sa fesoasoani i le faamoemoe i lea lava afiafi.
O se avanoa foi e momoli ai le faafetai tele a le susuga a Tuilavasii Tom Aiono mo le mamalu o le atunuu, aemaise paaga, uo ma aiga sa auai ane ma faatasi i le faamoemoe. O le faafetai faapitoa mo le tamaitai o Daphne Papalii Malietoa, sa ia ootiina le lipine ma le tatalaina o le taumafaiga lona tolu a le afioga Tuilavasii Tom Aiono.
O Tuilavasii Tom Aiono e mai le afioaga o Fasitoouta ma Samatau, ma sa ia molimauina foi le toatele o nisi pepese mai ona afioaga e pei ona ta‘ua, sa fai ma taiala ma faamalosia ai lona fiafia e faaauau pea le taleni.
Ia talosia ia aveaveai ai le meaalofa ma le taleni pese, ma ia iai sona aogā mo i latou e faafofoga i ai, aemaise o tupulaga laiti e luitauina ai, ae ia vave ona toe liua ai ma le tama pese.