“E mae‘a lava polokalame nei ua tofu sao uma lava sui o afioaga, malo ma faalapotopotoga fesoasoani,” Mena Nelson – faauluuluga o tali o faalavelave faafuasei (DMO)
O se faalavelave ua atoa i le asō le tolu o tausaga talu ona tulai mai ma ua faagasolo foi sauniga e talosia ai le puipuiga o Samoa mai i le toe tulai mai o ia ituaiga puapuaga, ae lē gata i lea o le manatua ai o i latou e pele na fano ai i lea faalavelave faalenatura.
Mo i latou o le vaega o tali o faalavelave faafuasei a le Matagaluega o Punaoa faale-Natura ma le Siosiomaga, o se faalavelave na mae‘a ae amata faamalosia ai loa le galuega ina ia lava saunia tagata uma o Samoa aemaise nofoaga maualalalo tu matafaga i auala e vave ai le tali atu i nei ituaiga faalavelave tetele faapea. O le itu mautinoa e toe tulai mai foi ae ia tulai mai e pei ona ta‘ua e le Matagaluega lenei, ua lava le iloa o tagata o afioaga uma i auala e agai i ai – o nofoaga e sulufai i ai ma le faamautu o auaunaga uma ina ia mautinoa e leai ni faafitauli e faamamafa atu i taimi o puapuaga faalenatura faapea. Talu mai lea faalavelave ua faagasolo le polokalame e fua lelei ai nofoaga nei e pei ona ta‘ua aemaise o le iloa e afioaga uma o le tiute a lea tagata ma lea tagata ina ia vave ona agai ese mai i nofoaga ua iloa e lē saogalemu. Ua faamautu ai foi aoaoga ina ia mafai ona iloa e tagata e eseese ituaiga galulolo, o le galulolo e mamao le nofoaga e amata mai ai ae oo mai lava i Samoa ave malolosi o galu e aafia ai, ma galulolo e tutupu tonu i ogasami ma ogaeleele o Samoa lava ia aemaise o le aoaoina o le maualuluga o galu ma le tali atu i le taimi e faagasolo ai lapataiga.
Faaalia e le tamaitai o loo ua faauluulu iai nei galuega tetele o sauniuniga, o Filomena Nelson, e tele ma anoanoai galuega ua faatautaia, ua lē gata ina lē fuaina ma le unaia o vaega o nuu e agai i ai le lautele i ia taimi, ua oo lava i faailoilo, o le fausia o sailini mo le vave ona iloa e le atunuu o lapataiga, o le suiga ua iai nei le faalauiloaina o lapataiga o le suiga o le tau e pei ona faaaogā ai telefoni feaveai.
O le tofia o komiti ma soa komiti ina ia mafai ona galulue ma fesootai sui uma o matagaluega ua i le vaega o tali muamua i nei ituaiga faalavelave. O le faaleleia o fesootaiga ina ia aua ne‘i fesasiai fesootaiga ae ia tasi se tagata e taulai i ai fesootaiga uma a ofisa ma auaunaga eseese. Ua iai foi le polokalame ua faagasolo nei i afioaga ua faatautaia e le Koluse Mumu – faatupe e le Koluse Mumu a Ausetalia ina ia mautinoa e mafai e tagata o nuu le tali poo le fesoasoani muamua, o le faatuina o tane vai i nofoaga e sulufai i ai i taimi o faalavelave ma le mau galuega e mafai ona faatino e tagata uma o afioaga ina ia faasao mai soifua i le taimi o faalavelave faafuasei.
“O le amataga o nei polokalame ua vaavaai ai i afioaga na aafia i le tsunami e amata ai e pei ona faagasolo nei ae e 330 afioaga o le atunuu ma e faaauau ai lava nei polokalame pe a faaopoopo le tupe maua mai i fafo ina ia faatino ai”. “E lei malolo lava talu mai le tsunami ma e lē tatau ona mālōlō fuafuaga faatino ina ia mafai ai ona faafaigofie le tali atu – ia lelei fesootaiga ma ia aua ne‘i alu lava le auaunaga ia e faatino a latou galuega ae leai se fesootaiga auā o le tasi lea o faafitauli na tulai mai i le tolu tausaga talu ai, ua alu lava le auaunaga ia e faatino a latou tali i le faalavelave ae ua leai se fesootaiga ma tuai ai le oo atu o se tala mautu i le tulaga o iai afioaga i tua ma manaoga o loo fia tali vave i ai. O lea la na faatautaia i lenei vaiaso se isi faataitaiga ina ia mafai ai ona faamalosia fesootaiga nei a le komiti lea ua ta‘ua o i latou lava e muamua tali atu i faalavelave faafuasei. Ua iai foi se fuafuaga e faatutū nofoaga e fesootai ai i leitio auā le vave ona maua o lipoti i taimi o faalavelave faafuasei faapenei.
Ua faamalosia foi ma le nofoaga tutotonu o fesootaiga i taimi o faalavelave faalenatura, lea e i Tuanaimato. “E uma polokalame nei ua iai uma lava le sao o tagata uma i totonu o afioaga taitasi, o totonu o ofisa eseese a le malo ma faalapotopotoga tuma‘oti, ma o le tulaga lava lea e tatau ona iai, o le taumafai lea ina ia iloa e tagata uma le tāua o le nofo sauni, le tāua o le tali atu i le taimi e tulai mai ai nei faalavelave,” o se faamatalaga lea a Nelson.
O le tausaga fou ua iai foi se fesootaiga ma le Fitafita a Niu Sila e faatino ai ni faataitaiga tetele e vaavaai ai le tulaga o iai aoaoga ma faalauiloa ia ua faagasolo. E lei faamautu se aso ae o se vaitau o le ogatotonu o le tausaga fou ua tatau ona faatino ai lea faamoemoe.
E oo i faalauiloa ina ia faapipii i nofoaga maualalalo o le atunuu ua iai lava ma le sao o tagata o afioaga eseese i le tusia ma ata e faaaogā ma o se galuega na ta‘ua e Nelson e ese le aogā aemaise i le sao o tagata lautele o afioaga, o i latou ia o loo nonofo ai i ia eleele ma o i latou lava e malamalama ai i ia faasilasilaga faalauiloa ma faaaogā tonu i taimi o faalavelave faalenatura. O le fesoasoani a Niu Sila, Ausetalia ma Iapani, faapea ai foi faalapotopotoga e aofia ai ma Amerika ua faafetaia e le Faalapotopotoga lenei o Tali o Faalavelave Faafuasei ona o le a mafai ai e Samoa ona faaauau soo se ituaiga galuega o polokalame ma fuafuaga ua faagaioi nei auā lava le tali atu i le toe tulai mai o ni mafuie, o afā fulifao, o galulolo poo galuafi aemaise foi nisi faalavelave matautia e ono tulai mai ona o le suiga ua iai nei le tau i lenei vaitaimi o le tausaga.
