O le amataga o le tausaga lenei na faalauiloa mai ai le tofiga fou o le laulauafono a le Faalapotopotoga o Malosiaga tau Eletise i Amerika Samoa, lea e silafia e le toatele o le ASPA. O ni tofiga na faia e le afioga i le Kovana o le teritori, le afioga Lolo Letalu Moliga.
O le faaaliga a le alii ofisa sili o le Malosiaga tau Eletise a Samoa nei le EPC, le afioga Tologata Tile, e ui i lenei tofiga fou ae e lei faamavae Fonoti ma ona tofiga tāua o loo faatinoina nei i le EPC, o se Konesale (Consultant) ae lē gata i lea o le Taitaifono a le Komiti Faafoe o Suesuega Faasaienisi i Samoa le SROS.
“E tāua tele le auaunaga a Fonoti mo le EPC, ma e lē o iloa pe iai se afaina o lana auaunaga o loo faatinoina i le EPC ma tofiga ua faapea ona faailoa mai e le Malo o Amerika Samoa,” o le saunoaga lea a Tologata.
O Fonoti o se tasi ua loa lana tautua i le Malo o Amerika Samoa, aemaise lava i le Matagaluega o Eletise a Amerika Samoa le ASPA, ma o le tausaga ua mavae na tofia aloaia ai o ia e avea ma Konesale faapitoa a le EPC ma tofia ai e avea ma Taitaifono o le Komiti Faafoe a le SROS poo suesuega faasaienisi a Samoa.
O le vaega o inisinia a le EPC lea e galue ai le afioga Fonoti ma o le taimi lenei o loo faamautu lava lona faletua ia Maria ma o la alo i Amerika Samoa.
E lē o iai ni tulafono a le faalapotopotoga i Samoa e faasā ai tulaga faapenei e ui o loo iai galuega a le Malo e lē mafai ai ona galue se tasi mo se kamupani ae toe maua galuega i isi kamupani ae e foliga mai o tofiga o faatonu i komiti o faatonu a isi matagaluega o loo mafai ona ofi i ai soo se tasi o loo galue i ofisa a le Malo o Samoa.
