E faigata tele vaaiga o le feilaoiga muamua a Faasalafa ma Faafetai Sione o Tiavea ma le la fanau ia e vaai ma tausi e le Toomaga mo Tagata Puapuagatia.
O le ulugalii lea ua tuli nei le faasalaga o le soloatoa i le falepuipui i Tafaigata ona ua faamaonia lo la moliaga o le Fasioti Tagata Faamoemoeina e le Faamasinoga Maualuga.
O le tulaga faigata o feiloaiga nei i le va o mātua ua solitulafono ma fanau – e lē o amanaia lava e fanau le ogaoga o le tulaga ua oo i ai mātua ma e pei lava o le vaaiga masani, na taunuu atu loa mātua i le nofoaga o faapotopotoga ai le fanau i le Ofisa o le Toomaga mo Tagata Puapuagatia, na o le sagisagi ane o le fanau aemaise le vaega laiti ma fusifusi ma sogi atu i mātua faapea le Peresitene o le Toomaga o Lina Chang.
E leai lava se tulaga e vaaia ai e mumusu tamaiti laiti nei e feiloai i mātua ma o le taimi atoa na molimauina le fiafia o le fanau ina ua feiloai atu i mātua.
E manino foi le faigata i le tina ia Faasalafa o lea feiloaiga ae na molimauina le lototele ma e leai ma se loimata na maligi a o taumafai e talanoa taitasi atu i le fanau ua lolofi ane ma nonofo pipii ane i mātua.
O le masina na tea nei lea na faasala ai, ma o le masani ai, a soloatoa e tele lava ina tuli le 10 tausaga ona faato‘ā mafai lea ona iloilo e le Komiti o le Palola pe talia le faasaoloto pe leai foi.
Na ioe uma lenei ulugalii i moliaga ona o le maliu ai o le la ulumatua o Rosemay i le ono tausaga talu ai.
Talu mai la ona tuli le faasalaga, o lea faato‘ā mafai i le vaiaso na tea nei ona feiloai lea ulugalii ma le la fanau.
O le toavalu uma o loo vaai ma tausi e le Faalapotopotoga o le Toomaga mo Tagata Puapuagatia.
O le faaiuga o le tausaga na tea nei na amata auai ane ai le fanau lenei ina ua faamaonia se isi solitulafono a le latou tamā, o Faafetai Sione i le faiga lea o uiga matagā faasaga i se tasi o le fanau.
O le sala lea o lea faato‘ā tuli foi a lea alii auā e falepuipui ai foi.
O le tausaga nei la i le amataga ina ua laga suesuega o le leiloa ai o Rosemay na ave uma ai loa e le Toomaga mo Tagata Puapuagatia le fanau lenei.
O lona uiga o le tausiga o le fanau i aso uma ma le faaaooga ai i polokalame faaleaoaoga a le Toomaga mo Tagata Puapuagatia, ua faia uma lava e lenei faalapotopotoga.
Ta‘ua e Lina Chang, o le taimi lenei o loo tālia se fesootaiga ma Leoleo ma faamautu ai aiga o le ulugalii lenei e iai le manaoga e ave le fanau latou te tausia a o tuli ai faasalaga o o latou mātua.
O le faatagaga mai i le Matagaluega o Leoleo ma Falepuipui lea na mafai ai ona feiloai le ulugalii lenei ma le la fanau i lalo o le vaavaaiga a sui o le Matagaluega ma le Faalapotopotoga o le Toomaga mo Tagata Puapuagatia.
Ua mae‘a faalauiloa foi e nisi o le aiga o Faasalafa le manaoga o le a o latou ave le fanau e tausi i ai a o faatali ai o latou mātua ae e lei faamautu lava la sea tulaga i le Toomaga mo Tagata Puapuagatia.
O le tausiga o le fanau e toavalu lenei e mautinoa e lē faigofie auā o le Toomaga mo Tagata Puapuagatia e lē o iai ni faaputugatupe ua faaagaga mo le tausiga o ni fanau toatele poo le nonofo tumau ai foi o nisi i le latou vaavaaiga.
E lē pei o isi atunuu e iai alagatupe e mafai ona tausi ai e faalapotopotoga fanau nei.
E faamoemoe le Toomaga mo Tagata Puapuagatia i le agalelei atu o isi tagata ma faalapotopotoga, pisinisi ma le Malo mo ni nofoaga e faamautu ai i latou e sulufai atu ma lo latou tausiga.
O le mafuaaga lea o le moomia o le lagolago o aiga o i latou ua sulufai atu mo le faaauau ai o tausiga ma fesoasoani nei, e ui o lea ua lototele lava Lina ma le faalapotopotoga mo lenei taimi e faaauau lenei tausiga.
E o ese le fanau i lea uluai feiloaiga ua faigata ona taofiofi le fetagisi o nisi o le fanau aemaise le pepe lea e tolu tausaga le matua.
O le fanau uma e mai i le 15 tausaga seia oo i le tolu tausaga le matutua.
O le faamoemoe o le Toomaga ina ia maua pea feiloaiga faapea a lenei ulugalii ma le fanau a o lei aveesea le fanau mai i le latou vaavaaiga.
E oo mai i le taimi nei e lei maua lava le tino o le teineititi matua, o Rosemay lea na suesue e Leoleo, e ui o lea ua ioe le ulugalii na o la faaoo lava le oti i le teine matua lea.
