E ui i feeseeseaiga ua ave uma ai le tele o taimi o televise, leitio ma nusipepa e faatatau i feeseeseaiga ua laga i le va o le Kapeteni o le Manu Samoa ma le Iuni Lakapi a le atunuu, ae ua faaauau pea galuega atia’e a le Iuni lakapi ina ia fesoasoani ai i le atunuu.
O le faaiuga o le vaiaso na tea nei na talimalo ai Samoa i ‘au mai i Fiti, Ausetalia, le Atu Solomona, Papua Niu Kini, Vanuatu, Niu Kaletonia ma Amerika Samoa i le Taamilosaga o le Taitoafitu a lenei itulagi o le Oceania.
O se taamilosaga ua aofia i totonu o polokalame ina ia mafai ai ona saili nisi laasaga i le faatulagaga o autaitoafitu a le Pasefika. O se auala foi ua mafai ai ona sauni ‘au uma a le itulagi mo taaloga faavaomalo a le IRB lea o le a faagasolo nei. Mo Samoa o se tasi lenei o taamilosaga maualuga i ana sauniga mo le IRB ma o le mafuaaga lea o le faafetaia o le talimalo ai o Samoa i lea taamilosaga i le taimi nei.
E fai lava la finauga a le Iuni Lakapi i sui o lana Komiti Faafoe ma le alii Kapeteni o le Manu Samoa Mahonri Schwalger, atoa ai ma isi sui tuai o le Manu Samoa, e lei aveesea ai le faatāua na ave e le atunuu i lea vaega o le Lakapi, i le taitoafitu.
E lei auai mai le siamupini o le Oceania i le taamilosaga na faia i Samoa ma e lei mafai foi ona tali mai le Iuni Lakapi i Samoa i le mafuaaga ua lē auai mai ai Niu Sila. E ui o lea e lei taofia ai le faagasologa o le taamilosaga na faapea ona molimauina e le toatele o le atunuu i le Aso Faraile ma le Aso Toonai.
Na molimauina ai foi i le solo tele na faatautaia i le ogatotonu o le vaiaso ua tuanai le faatāua na ave i le atina’e o le lakapi a fanau.
O lea solo na aofia ai ma nisi o aoga a tama ma teine na mafai ona faia ni taaloga ma sui o kalapu lakapi na auai mai mo le taamilosaga tele lenei i luma lava o le Maota o le Malo i le Eleele Fou – O se auala ua saga unaia ai le taaloga lakapi i fanau laiti o le atunuu ma na manino lava le malosi tele o le lagolago o loo ave pea e le atunuu i lenei taaloga.
O le faaiuga foi o le vaiaso na faatautaia ai ma le Polokalame a le Faalapotopotoga o le Toomaga mo Tagata Puapuagatia lea foi na lagolagoina e le Iuni Lakapi a Samoa o se aso e mafuta ai mātua o loo iai a latou fanau i lalo o polokalame a lenei faalapotopotoga aemaise i le vaega o tupulaga talavou.
O le afioga Lilomaiava Taufusi Salesa o le sui lea o le Iuni lakapi na faasoa atu le aoga o lenei paaga ina ia saga unaia ai le faaitiitia o le tulai mai o faafitauli e pei o sauāga o fanau i totonu o aiga, ona o le manatu a iai se gaioiga e mafai ona tali atu ai i le unaiga o le mafutaga vavalalata a mātua, atonu o le lakapi le isi taaloga.
E lē gata i lea o le unai a le Iuni Lakapi e faalauiloa le tāua o le saogalemu o aiga ma le sao o alii, ia e toatele lava o loo aafia foi i taaloga lakapi, i le taofia o nei sauāga. E faitioina lava foi le taaloga lakapi ona o le auala lea ua faaaogā e le tele o alii e inu ai le pia ma faapea ona agai ai i aiga ma faatupu vevesi ai, ma o le tasi lea o mataupu na laga i mafutaga nei auā le taumafaiga e taofi sauāga i totonu o aiga.
O le amata la o suiga mai i totonu o kalapu lakapi o le isi auala lea ua vaai le vaega talavou o le Toomaga mo Tagata Puapuagatia atonu o le a tele ai ma se suiga o lenei faafitauli o loo faaauau ona molimauina i totonu o Samoa i sauāga o fanau ma tina.
