Oloo faaauauina pea le faailoga sikolasipi oloo ofoina atu e le Mafutaga a le 4SJC88 auā le totogia o le pili aoga, meaaoga, ofu aoga ma mataupu o le suega mo se tama aoga i le vasega 12 a le Kolisi o Sagato Iosefo i Alafua.
O lenei sikolasipi ua lua ai nei tausaga o faia pea e le mafutaga a i latou sa aotauina i le Kolisi o Sagato Iosefo i le vasega o le Form 4 i le tausaga e 1988. O lenei mafutaga ua faaigoaina o le 4SJC88.
O le tau aofai o lenei sikolasipi e $1,300 tala Samoa lona faatupeina. O lē ua faamanuiaina i lenei faailoga sikolasipi i le tausaga aoga nei o Setu Enoka. O le uluai faailoga lea sa faamanuiaina ai Paepaetele Sefa i le tausaga na tea nei.
Oloo aofia i le sikolasipi, le pili aoga o Setu Enoka e $1,020, 2 seti o ofu aoga mo le tausaga aoga, meaaoga faapea ma mataupu o le a sueina e Setu i le suega a le School Certificate.
O le failautusi a le 4SJC88 ia Laulu Tuugatiti Leauanae ma le sui o le Mafutaga ia Luatua Mati Leiite Setefano lea sa auai e tauaaoina le faailoga i le vaiaso na tea nei.
Na faafetaia e Setu Enoka le faailoga ma ia faaalia ai le tele o le faamāmā avega i ona mātua o lenei sikolasipi ua ia taulimaina. Sa ia tautino foi le tuu atoa o lona agaga i le aoga ina ia faamalieina ai manaoga o le sikolasipi.
Sa momoli e Leauanae le faamalo ia Setu atoa ai ma lona luitauina o isi tama aoga ina ia faaaogā tatau le avanoa ua maua, ona e tāua tele le olaga aoaoina. Sa ia faapupula foi le tāua o avanoa sikolasipi e faamanuiaina ai faapei o le sikolasipi mai le 4SJC88.
“O lenei sikolasipi o loo agai i tama aoga tulaga ese le taumafai ae manaomia e aiga le fesoasoani tau seleni,” saunoa ai Tuatagaloa Aumua Ming Leung Wai, le peresitene o le 4SJC88.
O isi ala fua o le sikolasipi e manaomia ai le tama aoga ina ia faaaloalo, amio taupulea, loto fesoasoani, auai i galuega fai a le aoga, lelei i taaloga, lelei i le aoga, ia iai le naunautaiga e fesoasoani i le faaleleia o le aoga ma isi vaega tāua.
Na ta‘ua e Tuatagaloa, e faaauauina pea lenei sikolasipi i tausaga taitasi. O le sikolasipi e mo le tama aoga i le vasega 10 ae oloo iai le naunautaiga e faaauau pea lona aotauina i le Kolisi i le tausaga e sosoo ai.
O le Mafutaga a le 4SJC88, oloo peresitene ai le Loia Sili ia Tuatagaloa Aumua Ming Leung Wai, Tagaloa Faafouina Su‘a le sui peresitene, Laulu Tuugatiti Leauanae o le failautusi, Fuimaono Camillo Afele le sui failautusi, ma le teutupe o Solaimalo Peter Achatz Ott.
