O lea ua faamautu mai e le Malo e ala i lona ofisa o faamatalaga, ua manumalo le kamupani a le Ott Transport i le galuega tele lea ua amata ona vaaia i le talafatai o le taulaga mai i Vaisigano seia oo mai i Mulivai. O se puipui sima o le a faapea ona fausia i le va o le vai o loo tafe mai i le Vaisigano ma le vai lea o loo tafe mai i le ala sima lea e i Mulivai.
O le a faaopoopo lenei galuega i le fausia o le matafaga oneone uliuli lea ua amata ona faatino i lea itu o le taulaga o Apia.
O le faamatalaga a le alii Palemia, o le matafaga ua fausia ina ia faaopoopo i le faamatagofieina o Apia ae o aso ua mavae sa iai le matafaga i lea itu o le taulaga peitai ua tele suiga ma iu ai lava ina leai se matafaga.
O tafega ma lologa o le afā fulifao o Eveni lea na vaaia ai loa le toe sau o le oneone uliuli mai le Vaisigano ma o lea la ua faia ai loa le galuega ina ia fausia lea nofoaga auā le faamatagofieina atili o le taulaga.
Ua matuā tapu lava foi le toe agai atu o le atunuu e pei ona vaaia i le mae‘a ai o Eveni, e la‘u ese le oneone lenei. Ua faatutū lapataiga i lea nofoaga e faasala ai soo se tagata lava e agai atu ma la‘u ese le oneone ma ua faamausali nei i le galuega tele lea ua fai o le sua o lea nofoaga mo le matafaga tele.
I le fono a le Vaega faaupufai o loo agaia le Malo, le Tautua Samoa na ta‘ua ai le tele o le afaina o lea nofoaga pe afai ua fuafua le malo e fau ai se pa sima i tua atu lea o le matafaga.
O le mau a le sui faipule o lea Vaega faaupufai, le afioga Toeolesulusulu Cedric Schuster, o le tafe atu a vaitafe nei o le Vaisigano ma le vai i Mulivai, o loo faapea ona alu sa‘o i le va o maa o loo i lea nofoaga ma o loo sao lava le vai i le sami, ae afai ae taofiofi le alu a le vai i le sami ona o le sima lea o le a fau ai i lea nofoaga, o le a faapea ona tulai mai ai ma faafitauli i le lumanai.
Faaalia e Toeolesulusulu, e lei iai ma se lipoti ua faia e tatau ai ona malamalama pe saogalemu lea galuega o le a faatautaia. E ui o lea ua faaalia e le faalauiloa a le Malo ua mae‘a tauofoga a kamupani latou te fausia lea pa sima ma ua tasi ai i le Ott Transport latou te faatinoa lea galuega.
O se vaega lenei o fuafuaga ia ua mae‘a faalauiloa e le Malo i le tausaga na tea nei ina ia fausia ni nofoaga e pei o fale‘aiga ma faleoloa i lea itu o le taulaga ma ua fuafua uma mo le fono tele faavaomalo lea ua fuafua mo Setema o le tausaga nei, lea e malaga mai ai sui o atunuu e latalata i le 200 mo le fono a malo laiti tau atiae o le lalolagi le SIDS.
O lea la e foliga mai ua amata i le matafaga ae ua sosoo nei ma le pa sima e pei ona ta‘ua.
