E tolu galuega tetele o auala galue mo le motu tele i Salafai na tatala aloaia i le vaiaso ua te’a e le Malo. O galuega nei na fa’agasolo mai i le tausaga na te’a nei ma na taofia le tatalaga ona o le afa o Eveni. O lea la ua maua le avanoa ina ia tatala aloa’ia ai e pei ona ta’ita’ia ai e le Alii Palemia se ‘aumalaga o sui o le Kapeneta atoa ai Faauluuluga o Matagaluega ina ia molimauina ia galuega tetele.
O le galuega muamua i Lelepa na faapea ona faatautaia e le Konekarate a le ON & Sons ma na alu ai le $420,000 i lona tau atoa mo le faatautaiga. O le Afioga i le Minisita o le Matagaluega o Puna‘oa faa-Natura ma le Siosiomaga, le Afioga Faamoetauloa Dr Faalē Tumaalii na ave i ai le faaaloalo na te tatala aloaia lea galuega. Na sosoo ai ma le sauniga e tatala aloaia ai le galuega a le afioaga o Iva i le Faasaleleaga.
O le galuega lea na tatala aloaia e le tasi o sui a faipule o lea foi itumalo o Faasaleleaga Numera 1, le Minisita foi lea o Aoga, Taaloga ma Aganuu, le Afioga Magele Mauiliu Magele.
O le tau atoa o lea galuega e $336,000 ma o le konekarate fai auala a le Savaii Civil Operations Ltd na nafa ma lenei galuega. O le isi auala tele lava na mae‘a ia Mati ona fausia ae o lea faatoa tatala aloaia e le Malo, o le auala lea i le afioaga o Faala i Palauli. O se galuega lenei na fausia e le konekarate fai auala a le kamupani o Apia 2 ma o le tau atoa o lenei galuega e $553,000 (tala Samoa).
O le faafetai a le Minisita o Galuega na tatala aloaia lenei taumafaiga, le Afioga Manu‘alesāgalala Enokati Posala, o le lagolagosua foi a le afioaga i le faatinoga o lenei galuega ma le faafaigofie ai i konekarate ona vave faamae‘a lenei galuega.
O loo faagasolo foi nisi o galuega a le Malo i le itu lava lea o le faaleleia o ala galue mo le sopoia o faatoaga a le tele o afioaga o le atunuu, e lē gata i le motu tele i Salafai ae faapea foi i le motu o Upolu.
