Ua tuuaia e le afioaga o Magiagi le “taalo leaga” o le EPC le malosiaga tau eletise i le faaaoga o le afa o Eveni ma auala e faamalosia ai le mataupu o le pili totogi muamua (cash power) ae o loo taoto feutagaiga o le mataupu.
O le taimi lenei e toe lava o Magiagi lea e leai se eletise ua oo atu iai sei vagana ai le malumalu fou o le afioaga i le ekalesia Metotisi lea ua ola, o le malumalu o le Ekalesia a Iesu Keriso o le Au Paia o Aso e Gata ai lea e tali ai le to’atele o i latou ua leai ni fale e faamautu ai, o le malumalu a le Ekalesia o le Aso Fitu lea foi e faamautu ai isi tagata o le nuu ua leai ni fale i le taimi lenei ma le malumalu o le Ekalesia Faapotopotoga Kerisiano Samoa lea ua maua le eletise i le taimi lenei.
O le faamatalaga ua folafola e sui fai moli a le EPC i aiga ua talosaga mo le toe faaola atu o le eletise ua faatonuina i latou e le mafai ona faaola le eletise i maota o le afioaga sei vagana lava ua malilie aiga e faapipii loa le cash power.
O lea e taatia feutagaiga i le va o itu e lua ona o lea na folafola e le EPC le tele o le aitalafu a Magiagi i le 15 o tausaga e le toe totogia se pili o le eletise.
O lea foi la e faatali le afioaga i le faamautu ai o le pili lea ua ta’ua le latalata i le $2 miliona tala le aofai ona o le finagalo o le nuu e avatu pe fia aitalafu a aiga taitasi ma ia faamautu taui o le faaaoga e le EPC o fanua o le nuu ma le suavai i tausaga e 92 e aunoa ma se totogi ona faapaleni ai lea o lea aitalafu ae amata le cash power.
Ua faitau masina ia feutagaiga ma ua mae’a ona fua e le Komiti a le Malo fanua ae tulai mai loa ma le afa motusia ai loa le eletise ae o lea la ua sui le agai mai a le EPC.
Faaalia e le afioaga, e ese lava le puapuaga ua feagai ma le afioaga ona o le afa ese feutagaiga ia ua agiga ma faalauiloa ma ua le savali le komiti a le Malo i feiloaiga ia ua faaauau.
O le aso la ananafi na agai ai le afioaga i le Ofisa o Faamasinoga e aumai ai se taofiga o galuega ia ua faatino e le EPC seiloga lava ua toe faaola le eletise ae faaauau talanoaga.
O le faalauiloa a le Malo o lea e tele galuega moomia i lea itu o le atunuu ona faasopolia ai lea o le eletise ae e le o tuu mai se tala pe moni o le aiaiga fou lea e le faaola maota o le afioaga seiloga ua malilie e faapipii le cash power.
“Ua mae’a ona avatu le maliega a Magiagi e ola i le cash power, ae sei aumai lava se faamaoniga o taui e maua e aiga o le nuu aemaise o se faamaoniga o le aitalafu lea e ta’uta’u soo ona mafai lea ona faatino lea maliega aua e malilie loa le nuu e ola i le cash power e mautinoa lava le toe faagalo mai o matou, ma faaauau ai lava faiga nei o le leai o se taui e maua e Magiagi lea ua toeititi atoa le 100 tausaga o faaaoga ona eleele e le Malo. E maua mai loa se maliega tusitusia ona agai loa lea o le nuu e faaola uma o latou eletise i le cash power,” o se faamatalaga lea a le tofi o le afioaga le afioga Tuiono Uini Keni.
O le faamatalaga a le nuu, e le mafai lava ona mamulu atu se maliega leaga ua pelogia soo le nuu ma o isi afioaga o loo faaaoga e le Malo o latou fanua ua maua taui ae o le mumu fua o le eletise ona pau lava lea o le taui lea e maua e le nuu mai i le tele o tausaga o le fiu faatali tala ma maliega tuu gutu na fai.
Faaalia e se tasi o faimoli na fesiligia e le nuu ua ola laina e maua ai le eletise ae o le faafitauli ua aveese pine (fuses) e ta’i mai ai le eletise mai i laina o poumoli agai i maota eseese ma seiloga la e toe faapipii fuses nei ona fa’ato’a maua lea o le eletise.
O lea la e talia se isi feiloaiga i lenei vaiaso i lenei mataupu ma se tali ane a le EPC i le tusi taofi ua fai e le nuu.
