Ua iai se isi foi laasaga fou i le va galulue faatasi ai o le Matagaluega o Leoleo ma Falepuipui i Samoa ma le Matagaluega o Leoleo i Ausetalia.
O le vaiaso lenei na faatautaia ai se sainigalima ina ia faamautu ai le faaauau o le va galulue faatasi ai o le Malo o Samoa ma le Malo o Ausetalia mai i le tausaga lenei seia oo i le tausaga e 2016.
O lenei va galulue faatasi ai o malo e lua ua faamautu ai le fesoasoani a le Malo o Ausetalia i le ofisa lenei o le Malo i le faamalosia o le galuega faaletulafono poo le faaleoleo.
Ma o tausaga ua tuanai i lalo o lenei feagaiga na vaaia ai le faatautaiga o aoaoga faapitoa auā le tomai faaleoleo suesue o leoleo i Samoa nei, e lē gata i lea o aoaoga i le tali e mafai ona ofo atu e malu o le malo i soligatulafono matagā.
O loo faagasolo foi ma se isi galuega i le faaleleia o fesootaiga i ualesi a le Matagaluega i ona lala uma.
Ua na o le pau lenei o se vaega o se fesoasani tele ua mafai ai foi ona faaleleia le itu tau i femalagaaiga a le Matagaluega, o lana vaaleoleo o le MV Nafanua, o le toe fausia o fale fou ma ofisa fou a le Matagaluega a Leoleo.
Ua lē tasi ae ua lasi fesoasoani ua mafai ona faatino i lalo o le va galulue ai o malo e lua aemaise lava i le itu lenei o le faaleleia ma le faamalosia o le puipuiga o le saogalemu i Samoa aemaise o le unaia o le faatinoga o galuega faaleoleo i soo se itu o le atunuu.
O le fesoasoani lava foi a Ausetalia lea ua mafai ai ona vaaia se suiga tele i ofisa tutotonu o le Matagaluega o Leoleo e pei ona iai le ofisa fou i Tauese.
O loo iai foi se isi fuafuaga ina ia faamautu se vaa fou a leoleo i ni nai tausaga i luma atu ma o le malo foi o Ausetalia lea na foai mai le MV Nafanua mo le leoleoga o ogasami o Samoa lea ua iai le fuafuaga e toe faafou se vaa faapea mo Samoa e ala mai i le faiga faapaaga i le va o malo e lua.
O le maliega fou na sainia i lenei vaiaso ua faatali nei le faatinoga o ona aiaiga i le faamaonia mai o le faamatuu mai o le seleni e faatino ai.
O le sainigalima o lenei maliega o fesoasoani faaauau na faatautaia i le va o le afioga i le Minisita o Leoleo a Samoa le Afioga Sala Fata Pinati atoa ai le Afioga i le Hai Komesina o le Malo o Ausetalia, Dr Stephen Henningham ma na molimauina e le Afioga i le Komesina o Leoleo, Lilomaiava Suemalo Fou Taioalo ma le Pule o le Polokalame lenei o le faiga faapaaga i le va o Leoleo a Samoa ma Leoleo a Ausetalia, o Suparanitene o Andy Warton.
