Ua amata ona tapena le galuega o le toe faaleleia o le Maketi i Fugalei ona o le manaoga o le Pulega o lea nofoaga faitele ina ia toe faaleleia atoa le nofoaga aupito sili ona tumutumu i le atunuu i aso uma – ua iai foi fuafuaga o le faalautele atili o lea nofoaga ae o galuega ua amata nei ona moomia ai ma le agai ese o i latou e iai faleoloa ma poloka i le maketi ina ia saili nisi nofoaga e ave i ai a latou oloa ma fua o faaeleeleaga e faatau ai ona o lea ua amata galuega.
O le faitioga lava la ua faaauau talu ona faalauiloa lea suiga, o le leai o se nofoaga e agai i ai le au fai poloka – tagata ia e faatau fua o a latou faaeleeleaga i le taimi lea e tapunia ai le Maketi i Fugalei ona o le galuega ua faagasolo nei.
E toatele e le o iai se manaoga e agai i le Maketi lea e i Vaitele auā o loo ta‘ua e le Faalapotopotoga o taui o faalavelave faafuasei, le ACC – lea e pulea le maketi o loo matua tele lava le avanoa o loo iai aua le tali atu i manaoga o le au fai faatoaga.
Faaalia e nisi o le au fai oloa i le maketi i Fugalei o le a matua tele le aafiaga o i latou ona o le itu lea e tau agai i Vaitele i aso uma.
O ina foi lea o le a agai i ai taavale ma pasi aua o lea o le a tele ina faamautu i ai le au fai poloka, ma o le mau a nisi na agai muamua i lea nofoaga, e le tele ni faatau i lea vaega o le talafatai o Apia.
O le faafitauli tele ona e leai ni nofoaga faatali pasi ma e le o tutu ai le tele o pasi ma maua ai le anoano o le atunuu e pei ona vaaia i aso uma i Fugalei. Ae atonu a amata loa ona agai i ai le atunuu i le taimi e tapunia ai Fugalei, atonu o le a vaaia ai se suiga tele o faatau e maua i lea itu o Vaitele.
O le isi nofoaga o loo tumutumu ai le mamalu o le atunuu i aso uma o le nofoaga lea o le flea-market poo le maketi o lavalava ma faleaiga lea e i Savalalo, le maketi tuai lea ua suia atoa – o loo tele le nofoaga faatali pasi i gatai mai o le maketi o i‘a peitai e le o toe faatagaina le faatau ai oni meamata ua na o taumafa lava o faleaiga ma fale lavalava ma mea taulima.
O le masina na tea nei na savalia ai e nisi o le au fai oloa ma fai faleaoloa i le Maketi i Vaitele le ofisa o le Alii Palemia ona o le manaoga e tuu ifo i lalo le totogi o nofoaga nei oloo latou faaaogā talu ai e le o tele ni faatau i lea nofoaga.
O se fautuaga na faapea ona faaali e le alii Palemia i le pulega o le Faalapotopotoga o Fanua o Samoa lea e pulea lea nofoaga ma na maua ripoti ua ioe le Pulega e faataunuu lea tulaga.
O lea la ua mae‘a tali atu i le manaoga o le au fai poloka i totonu o le maketi i Vaitele ae o lea ua laga mai le manaoga o i latou o loo i Fugalei.
O le faamatalaga na maua i le pule o le ACC o Maleulu Losi Niumata o le taimi lenei oloo faamae‘a lava feutagaiga i nisi o fanua i tala ane o le Maketi i Fugalei ina ia faalautele ai nofoaga mo le au fai faatoaga ma e aofia uma ia feutagaiga i le galuega tele lenei ua amata ona tapena ese ai le au fai oloa i lea nofoaga.
Sa iai foi faitioga ona o le lē lava o poloka ma nofoaga auā faleoloa i Fugalei. O faitioga na laga ina ua amata ona faaaoga nofoaga faatali pasi i Fugalei e faatau ai a latou oloa.
O lea foi la ua faatino le galuega ina ia mautinoa e maua uma nofoaga mo i latou nei ae e lē o uma lava faitioga, ma na ta‘ua e le alii Pule e silia i le to‘a 40 tagata o loo i le lisi faatalitali mo ni avanoa i lea nofoaga i Fugalei.
E le toe taofia le galuega e pei lava ona molimauina le amata ona tapena ese o nisi, ae o loo tumau faitioga ua faaleo i luga o televise ma leitio faapea ai nusipepa a le toatele ua tau saili nei nofoaga e faamautu ai i le taimi o le galuega.
