Ina ua tapunia faafuasei a’oa’oga a le Best Training ia Novema i le tausaga ua mavae, o se faanoanoaga tele lea sa iai alo ma fanau o le Pasifika aemaise lava i alo ma fanau sa finafinau e saili le lumani manuia aemaise o aiga. O se taimi na faafaigata ai ona fai filifiliga a fanau poo fea se nofoaga o lea toe faaauau ai a’oa’oga ina ia mafai ona latou ausia le moemitiga o loo taoto i o latou loto ina ia mafai ona maua ni galuega lelei mo latou sei fesoasoani ai mo latou aiga aemaise o le tausiaina o latou mātua.

I le tulai mai o lea faafitauli e lei muta ai le ola finau ma le ola sailiili o nei fanau i le toe vavaai lea o a’oa’oga o loo mafai ona latou avea nei mataupu sa latou aooga ai le Best training ina ia taulau o le faamoemoe.

O le vaega sa sili ona tāua i le manaoga sa iai fanau i lea taimi ona sa iai le afioga i le faletua ia Tina Pio Nansen sa galue ai i lea taimi i le Best Training o ia la lea sa fesoasoani malosi i le manaoga o nei fanau ina ia faataunuuina lo latou moemitiga i se aoga e faaauauaina ai a latou a’oa’oga. Peitai e lei vale le taui o le tamaititi naunau ma le faamaoni, ma o lea sa tali atu ai loa le auaunaga a le Skilll Update i le talia lea o le faletua ia Tina Pio Nansen latou te galulue i totonu o lea auaunaga ina ia faaauau ai ona tiute sa galue muamua ai i le Best Training.

O le avanoa lea sa mafai ai loa ona saini faatasi nei fanau aoga e 23 ma le faletua ia Tina Pio ia Novema i le tausaga 2017 i totonu o le Skill Update. O Ianuari i le tausaga nei 2018 na amata ai loa ona faaauau a’oa’oga a fanau nei faatasi ai ma le faletua ia Tina Pio i le Skill Update i totonu o Magele i le Distribution Level 3 ma le Business Level 3. O fanau aoga e aofia ai tamaiti Samoa ma tamaiti Tonga.

A’o lei tapunia le Best Training ua leva ona aooga ai nei fanau, ae o le faafitauli sa tulai mai, latou te lei taulimaina lava ni tusipasi poo ni faailoga o mataupu ia sa a’oa’oina ai i totonu o lenei aoga, ma o se tasi lea faafitauli sa pito sili ona faanoanoa ai lagona o nei fanau, ona o lea ua faamuta le auaunaga a le Best Training a’o lea e lei maua ni faailoga poo ni tusipasi e saili ai ni a latou galuega.

Ae o le faafetai sili a nei fanau i le Atua ona ua mafai ona faasino mai se isi auala ma se isi faasinomaga mo latou ua mafai ona toe faaauauina a latou a’oa’oga, aemaise ai o le faafetai i le faletua ia Tina Pio Nansen ona o le tu malosi e lagolago o latou manaoga e pei ona iai.

Na ta’ua e le faletua ia Tina Pio Nansen ua tele le suiga ua oo iai le taumfai o fanau nei talu ona ofi mai i totonu o le Skill Update, ua le gata i le tele o le siosiomaga o a’oa’oga ua oo iai fanau ae ua tele foi mea ua agai iai lo latou taumafai e sailiili iai lo latou iloa ina ia mafai ona fesoasoani pea mo latou i le lumanai. O lona uiga ua le tasi se mataupu o lea ua tauaveina e nei fanau a’o lea ua maua ai ma isi avanoa e suesue atili ai galuega, e pei o le laisene avetaavale, laisene avelifi faatasi ai ma mataupu ia sa finau muamua ai.

Lelei ma matagofie totonu o le faleaoga aemaise ai o vaega o loo faatinoina ai le tele o a’oa’oga aemaise o taaloga. I le taimi nei o lea ua iai tamaiti aoga nei ua latou taulimaina nisi o tusipasi e maua ai a latou laisene avelifi ma laisene avetaavale.

O le ola finau o nei fanau, o le naunau lava ia taulau o le moemitiga ina ia iai so latou aogā ma so latou sao i totonu o latou aiga mo le tausiaina o mātua aemaise so latou lumanai manuia.