O le finagalo lea ua faaalia ele taitai o le Malo, le alii Palemia, le Susuga Tuilaepa Lupesoliai Sailele Malielegaoi i fuafuaga a le Malo ua faapea ona mae’a faataatitia ma faasalalau mo lenei tausaga ma na faaalia e le Alii Palemia e le avea le afatia o Samoa i le afa ma auala o le a taofia ai fua ia fuafuaga.
O nei atina’e tetele ua aofia ai le fausia o se fale fogafale 15 i Savalalo. O le faamoemoe o le fale tele lenei o le a faamautu ai kamupani mai i Asia ia ua iai le manaoga e galulue i totonu o Samoa ma o le fale lea o le a faaaoga mo fefaatauaiga (Financial Center) e pei ona faalauiloa e le Minisita o Tupe le Afioga Faumuina Tiatia Liuga i le tausaga na te’a nei.
O le isi atina’ tele o le toe fausia atoa lea o le Maota o le Malo lea e i le Eleele-fou mo se faletalimalo (five-star).
O le fale tele lea o loo iai ofisa o le Palemia ma le Kapeneta aemaise Minisita o le Kapeneta faapea ai nisi o ofisa o le Malo i le taimi lenei ae o le faamoemoe e agai uma ofisa nei le maota tele o le Malo lea e i Sogi le maota o Tuiatua Tamasese Efi mo o latou ofisa ae o le a faaaoga le Maota lea o Fiame Mataafa Faumuina Mulinuu i le Eleele fou mo le faletalimalo tele lea.
Ua iai foi fuafuaga e suia atoa lava le talafatai o Apia mai i ga’uta o le maota lea o le FMFM e faatutu ai ni faleaiga faapea ai ni fale faafiafia aua le faatosina mai ai o tagata tafafao mai i fafo.
O fuafuaga uma nei ua ta’ua e le alii Palemia o le a faaauau ona faatino i lenei tausaga e ui i faigata ua amata faafeiloai ai le atunuu i lenei tausaga.
O le faamatalaga a le Faletupe o le Lalolagi, e mautinoa lava e tele le aafiaga o le tamaoaiga o Samoa ona o le afa lenei o Eveni ma ua tele se vaega o atina’e tau faatoaga ua faatama’ia ma ua toe foi fai faatoaga e toe toto le tele o faatoaga e pei fa’i, esi ma ulu faapea moli ma tipolo ua faaleagaina.
O le tausaga fou le tausaga e 2014 lea na fuafua e alu ese ai Samoa mai i le li’o o atunuu ia e ta’ua o atunuu aupito matitiva o le lalolagi. (LDCs – Least Developed Countries) ma o le faamatalaga a le alii Palemia e faaauau foi lea fuafuaga e ui o lea foi ua toe tulai mai se isi mala faa le natura e mautinoa lava le toe me’i ai i lalo o le tamaoaiga o le atunuu.
O le mafuaaga lava foi lea o le umi o le taimi o iai Samoa i totonu o lenei li’o o atunuu o le lalolagi ona e lelei lava ae e tulai mai loa faalavelave faa le natura toe foi lava Samoa i se tulaga maualalo o lona tamaoaiga.
E ui i lea o le faamatalaga a le alii Palemia o le a le toloa ia fuafuaga ona o le afa faato’a mae’a atu nei.