O le taeao o le Aso Lua na oo atu ai le aiga o le alii pagota ua au masinā o solasola ma le falepuipui, o Iosua Savusa ma toe momoli aloaia ane le alii pagota laititi lenei i le Minisita o loo avea nei ma faatamā o le Toomaga mo Tagata Puapuagatia, le Afioga Tuisugaletaua Sofara Aveau.
O feutagaiga i le va o le Toomaga mo Tagata Puapuagatia ma le aiga o Iosua Savusa ua mafua ai le maliega ina ia toe faafoi ane lenei alii o loo tuli faasalaga e soloatoa ai i le falepuipui ona o le moliaga o le fasioti tagata faamoemoeina.
Ua faalua ona sola ese Iosua Savusa mai le toese i Tafaigata ona o loo finau pea lenei alii talavou aemaise o lona tina e lei faia e lenei alii se solitulafono ae foliga mai ua aofai atoa ia ma alii na faatinoa le moliaga lea ua tuli ai nei le sala faafalepuipui.
E lē o le vaaiga lea a le Faamasinoga i lea mataupu, lea na faamaonia ai lava le fasioti tagata faamoemoeina o lenei taulealea faatasi ai ma isi taulelea e toalima ia ua tuli uma sala i le toese i Tafaigata mai i le osofaiga i le po o le Faauma o le tausaga e 2006 ma le vaveao o le tausaga fou 2007.
O le tala a lenei alii, e ese le nofoaga sa tafao ai ae fetaui le oo atu ua iai leoleo i le nofoaga lea na tulai mai ai le tagatavaleina o le tama Satapuala lea na maliu ai i osofaiga a alii Faleatiu ua taofia faatasi nei ma Savusa – na tuuaia faatasi ai lava i le susunu o fale ma le faaleaga o meatotino i le afioaga o Satapuala.
Ua uma ona faalauiloa le lē fiafia o le tina o lenei alii ma faapea mai ai e lē o sa‘o le faaiuga na fai i lona atalii ma o le mafuaaga foi lea o le lē toe gaioi ane o le tina lenei e toe faafoi lana tama i Leoleo ina ua sola ese nei.
O le tala a le tina sa ia momolia Savusa i le taimi muamua na sola ese ai ae o lea ua vaai atu i le mafatia o lana tama, e matuā lē manao lava e toe faafoi lona atalii ona o le manatu, e lē o sa‘o lava le aofai faatasi o lana tama ma i latou nei na molia i lenei solitulafono.
Sa tāpā le Ofisa o leoleo i lenei mataupu ma na ta‘ua e le Alii Sooupu o le Matagaluega o Leoleo ma Falepuipui, o lea lava na tālia poo le ā se tulaga e oo i ai feutagaiga a le Matagaluega faapea ai ma le aiga ma e lei iai foi se manaoga o leoleo e faalauiloa ana suesuega aemaise galuega e saili ai lenei alii, ae o lea la ua oo ane le aiga i le Toomaga mo Tagata Puapuagatia, ua manatu o le a auala atu i le faalapotopotoga le toe momoli ane o lenei alii.
E lei malolo foi le lagalaga pea e tusitala o le lē toe faafoi ane o lenei alii ona o le itu lea e ogaoga lava le solitulafono lea e tuli ai lona faasalaga faafalepuipui ma e ui lava ina iai le lagona i leoleo faapea ai foi le aiga ma isi tagata e silafia lenei alii, e lē o se taulealea e ono tulai mai ai nisi soligatulafono, ae o le tulaga faamaonia, o se pagota, o loo tuli le sala i le toese ona o le moliaga o le fasioti tagata faamoemoeina.
O le manatu o le Toomaga mo Tagata Puapuagatia afai ua ui atu i le faalapotopotoga le toe aumai ai o lenei alii i le toese, e faafetai ae o le popolega foi lava lea ona ua fai si leva o sola lenei alii ma maumau solo i togavao o lona nuu, ua mafua ai lava le manaoga ina ia toe faafoi ane i le vaaiga a leoleo Iosua Savusa.
Na fesiligia le Sooupu o le Matagaluega, le Afioga Leaupepe Fatu Pula pe o le ā se auala e mafai ona tali atu ai i le solasola ese soo o lenei alii, aemaise o lana finauga ua faaleo nei e lei faia nei solitulafono ua taofia ai nei o ia.
O le tali a le Afioga Leaupepe Fatu Pula, e faigata tele lenei mataupu ona o lea ua mae‘a ona fai i ai le faaiuga a le Faamasinoga Maualuga ma e lē faapea o le a taofia ai le manaoga latou o le alii lenei ma lona aiga e toe fai se iloiloga o le faaiuga ona o loo tumau le mau a lenei alii e lei iai i le taimi na tupu ai le moliaga tonu lea o le fasioti tagata faamoemoeina.
“Ae o lona uiga e toe agai lava le aiga lenei e totogi se latou loia e toe laga ai le mataupu pe afai o loo manatu lava le tina o Iosua o lana tama e lei aafia ai i ia osofaiga,” o se saunoaga lea a le sui o le Matagaluega o Leoleo ma Falepuipui. Ae mo le taimi lenei o le galuega a Leoleo o le vaai lelei o Savusa ina ia aua ne‘i toe sola ese mai i le toese.
O se isi foi solitulafono faaopoopo lea o le sola ese mai i le taofiga faafalepuipui e pei ona tuli ai lona faasalaga.
O le faaopoopoga o lea lipoti, o le alii lenei ua pou nei i le Afioga Mamalu i le Ao o le Malo, le Afioga Tuiatua Tupua Tamasese Efi, ma ua faamautu mai e le Komesina o Leoleo lea tulaga.
O se finauga a le tina o lenei alii lea ua tuuaia ai foi leoleo i le faaoolima soo i lana tama lea ua faaalia ai se tasi o mafuaaga o le sola ese soo o lenei alii, ma o lea la ua foliga mai ua suia le nofoaga e tuli ai lona faasalaga i le taimi nei.
