O le alii pese o Sualauvi, ua 31 tausaga o lona soifua, ma o lana uluai CD lenei, ua faaigoaina o le “Fai ma soo moni o Iesu”.
E sefulu pese o loo iai, e auga uma lava i le olaga faa-Kerisiano, poo le taumafai e faamuamua Iesu i o tatou olaga.
O le tamaitai o Moira Perenise o Foaluga ma Tanugamanono, o loo galulue faaatasi i le faatāuaina o Iesu, e ala atu i lenei taleni aogā.
O Sualauvi, e tupuga mai ia Pulesua Tupa‘i Tuiavii o Satuimalufilufi, ma Sesilia o Nofoalii.
O le aiga o lona tina, lea na amata foafoa mai ai lona olaga taumafai, i le Ekalesia Faapotopotoga a le Atua, i pese faa-Penetekoso.
Ona malaga ai lea i Tutuila, ae lei saili malo mai i Ausetalia.
Malo lava le manatunatu i se iuga lelei, auā o le toatele o le tupulaga, e talenia, ae maimau le pala o meaalofa mai le Atua ona o le faatalale. Ae amuia lenei tamafanau a le Atua, o loo faaaogā tatau lona siufofoga mo Iesu ma ona viiga.
