O se sauniga lotu puupuu na toe vaaia ai le tumutumu o le nofoaga sa iai le Ofisa o Faamasinoga ma fale Faamasino i Tauese i Apia.
O se nofoaga ua atoa nei le tausaga talu ona tapunia ina ua agai uma ese ofisa o le Faamasinoga i le fale fou lea ua tatala i Mulinuu.
E ui o lea ua toe fausia ma toe faaleleia atoa se isi vaega o lenei ofisa tele ma ua faaaogaina nei e le Faalapotopotoga o le Toomaga mo e Puapuagatia.
O ofisa fou faapea ai fale lē ta‘ua ua mae‘a ona toe fausia faalelei ma ua amata i le vaiaso lenei ona faaaogaina e le auaunaga faafaufautua a le Toomaga mo e Puapuagatia.
Faaalia e le tamaitai o Lina Chang lea e faauluulu i ai le ofisa o le Toomaga mo e Puapuagatia, i tua atu lava o ofisa nei ua toe faafou, o feiloaiga e fia faatautaia ma i latou ua sulufai atu mo se fesoasoani, o loo fai lava i le pumoomoo o le ofisa tuai lea na faamatuu atu i autafa o le Ofisa o Leoleo.
Peitai o le faamatuu atu o lenei nofoaga i le isi ituala, ua matua tele lea faamama avega i le toatele e agai atu ma faatalitali mo se fesoasoani.
E vaaia lava le tumutumu o le ofisa tuai o le Toomaga mo e Puapuagatia i aso uma ma o ofisa fou nei o le a agai i ai le toatele e manatu le faalapotopotoga e moomia le faatalatalanoa o a latou mataupu.
O le tele o mataupu o le a faaauau ona faatautaia i le Ofisa o le Toomaga o loo iai nei, o mataupu ia e agai sa‘o lava i leoleo ma le faamasinoga ae o mataupu e moomia ai le auaunaga lea faafaufautua (counseling) o lea o le a faatautaia i nofoaga fou nei na tatala aloaia i le vaiaso na tea nei.
O isi potu faamasino tuai, ua faatautaia ai nei aoaoga a le Faalapotopotoga lenei mo fanau e le o toe agai i aoga a le atunuu ae o loo taumafai le Toomaga ina ia faaauau pea a latou aoaoga i lalo o le latou vaavaaiga.
O loo aooga ai foi ma fanau o loo nonofo i fale o le Toomaga mo e Puapuagatia ae tālia ai faamasinoga ua aafia ai i le taimi lenei.
O se tasi lenei o laasaga fou i le galuega faafaufautua a lenei faalapotopotoga, nofoaga fou nei ua faaavanoa mo i latou. O fale nei o le Malo ae o le faaleleia ma le toe faafouga o nei nofoaga, ua faapea ona faatupe e se tasi o paaga a le Toomaga mo e Puapuagatia.
O se ofisa na ta‘ua e Chang e le o iai se finagalo e faalauiloa i latou, ae e $35,000 (tala Samoa) le tupe na avane e lea ofisa mo le Toomaga e toe fausia atoa ai ofisa fou nei ma fale lē ta‘ua aua galuega a le faalapotopotoga lenei.
E le gata i lea na ofo ane foi le taimi o le aufaigaluega a lenei ofisa ina ia o latou faamamā uma ia nofoaga fou ma o le faafetai faaauau a lenei faalapotopotoga ua faalauiloa, ona o le tele o le lagolago ua faaalia e ofisa, aulotu, faalapotopotoga tumaoti ma le Malo i le faatino ai o a latou galuega.
O le lua vaiaso ua tuanai na tatala aloaia ai le isi lala o le Toomaga mo e Puapuagatia i le motu i Sasae i Leone, Amerika Samoa.
