O lenei lava mataupu, sa taua i tusitusiga muamua, peitai e fia toe faamalamalamaina atili.
O le Taiala poo Fuafuaga Faataatitia Faaleaoaoga mo fanau Pasefika, e moni e le o manino mai poo matua mautinoa le lagolagoina o gagana Pasefika, peitai oloo iai avanoa e mafai ona tatou galulue faatasi e unai ai gagana a le Pasefika ina ia aofia ai i aoga i le aoaoina o fanau.
A tagai foi i le Taiala mo Aoga Amata [Te Whariki], e le o taua mai ai le atinaeina o ni Aoga Amata e faaaoga ai gagana a le Pasefika, peitai oloo ua faatupuina le numera o Aoga Amata e faaaoga ai gagana a le Pasefika, ona ua finagalo i latou na mua i malae, e taua ma aoga le gagana muamua a le tamaitiiti.
E pei foi ona finauina e le afioga i le faipule o Su‘a William Sio le faaaogaina o lana gagana [Samoa] i le Palemene. E ui lava ina e le o taua ma manino mai, ae a tatou maua le lototele e finau ai ma faatino, e maua lava avanoa.
E faapea foi i le Taiala faaleaoaoga mo fanau Pasefika, oloo iai sini autu ma faamoemoega e tatau ona ausia ina ia siitia le tulaga o aoaoga a fanau Pasefika. Ua talitonuina le faatauaina ma le amanaia o gagana tu ma aganuu ma le faasinomaga o tamaiti uma mo le solosolo lelei o a latou aoaoga. O avanoa taua ia e faaaoga e atinae ai polokalame e aofia ai le gagana muamua a le tamaiti.
E pei ona taua i le tusitusiga muamua, e tulaga ese lava le faasinomaga o le Samoa, aua e tolu ni ona vaega taua; o le gagana tu ma aganuu, fanua ma eleele, ma suafa matai.
Afai la o vaega taua ia o le faasinomaga, o le avanoa sili lea ona taua mo tatou e tatau ona tatou faaaogaina, e faavae ai ni polokalame e faaaogaina ma atinae ai le gagana muamua. E pei ona iai polokalame e faaaogaina le gagana muamua a le tamaitiiti ma le gagana faaperetania e aoao ai mataupu [Bilingual Education Programme].
O lenei lava polokalame, e le o le autu o le faaleleia o le gagana muamua, peitai, o le talitonuga, “A mautu tomai o le tamaitiiti i lana gagana muamua, o le a fesoasoani malosi ia tomai e faafaigofie ai ona iloa ma malamalama i le faaperetania, ina ia sololelei ma manuia ai le taumafai”. Afai e lua pe sili atu gagana e malamalama ai le tamaitiiti, o le faigofie foi lea ona malamalama i le gagana lona lua, ma faaaogaina i lona aoaoina.
Oloo iai lava avanoa tatou te galulue faatasi ai e lagolago ia polokalame ma finauina i totonu o aoga, ina ia faamanuiaina aoaoga o le fanau. Afai e talitonuina e matua o le faaaogaina o le gagana muamua a le fanau e aoga mo le siitia o le tulaga o le aoaoga o fanau, aua tatou te faatali, ae faaaoga avanoa.
Ona pau lava se pa pupuni tele o nei polokalame e pei foi ona saunoa ai le tamaitai minisita, o le le lava lea o faiaoga e iai le tomai faapitoa, e faiaoga ai i nei polokalame.
E le o le iloa tautala i le gagana e taua mo nei polokalame, ae o le iloa tautala ma fetuutuunai ai finagalo, ma le iai o le tomai faapitoa ma le malamalama lelei i tofa liuliu ma tofa manino a le au suesue, i talitonuga e faavae ai nei polokalame, aemaise auala e faatino ai ina ia talafeagai ma manaoga o fanau.
E le tau faatali ini tupe e atinae ai ia polokalame, ae oloo aofia ai lava i tupe oloo faasoasoa i polokalame taitasi oloo faatinoina e le aoga. O le isi vaega taua lea o le Taiala, o le tuu lea o le avanoa i le aoga e fuafua ai a latou polokalame e talafeagai ma manaoga o fanau oloo iai i le aoga. Tatou faaaoga ia avanoa, finau ma le mautinoa, finau ma le lototele, i polokalame e talafeagai lelei ma manaoga o le fanau, ina ia maua se lumanai manuia o fanau mo a taeao.
