O le a maua e le mamalu o le atunuu o loo papaaao i Aukilani se isi avanoa e toe silasila toto‘a ai i le alii pese ua iloga foi lona tulai mai i lenei vaitau ona o le mālie o ana faatuga, le susuga ia Tala Pauga.
O se faamoemoe na muai faatulaga i ni masina e lei mamao tele atu, sa faalauiloa muama ai le faasologa e amata mai Melepone ma faasolo mai i Aotearoa nei.
Peitai e pei ona saunoa le alii pese, o se tulaga sili lea ona faigata na la fesagaia ma lona uso pese ia Sau Siufanua, a o faatasi atu i se tasi o uo mamae ma si ona faletua i Melepone e sauni ai le la koneseti faalauiloa mo lenei CD & MTV, ae faafuasei ai ona maliu le faletua o si a la uo sa faamautu i ai, le fetalaiga ia Sa‘u Osovale Brown, si ona tausi o Elisapeta Ale Brown.
O le itu e sili ona faagalo gata ia Tala ma Sau e pei ona la ta‘ua, auā o laua tonu lava ia sa iai i le fale faatasi ma Elisapeta, i le taimi na palasi faafuasei ifo ai ma to ai lava lana mānava i lea taimi, a o la taufai molimauina, e ui i ni taumafaiga sa fai e tau faasao mai le soifua o si tina.
E pei o le itu lena na suia uma ai lava a la fuafuaga sa faatulaga mo a la faafiafiaga, ona ua peiseai ua sola mamao ese se naunau fiafia sa iai, ae na o lagona faanoanoa pe a manatu atu i se vaaiga faanoanoa sa la fesagaia i lea aso, i le vaai atu i se tina sa sili ona fesoasoani malosi ma lagolago ia la fuafuaga, ae ua motusia faafuasei le mafutaga ona o le maliu.
Peitai la, o lea ua toe maua sina lototele, ma ua faatulaga ai nei le aso 29 o Setema, o le Aso Toonai o le vaiaso nei, e faia ai se koneseti (live concert) a Tala Pauga ma lona uso pese o loo la faifaimea toalua ia la fatuga, le susuga ia Sau Siufanua. O le nofoaga o lena faafiafiaga o le kalapu faafiafia o le Parataiso i Otara.
O le fuafuaga o lenei koneseti ina ia toe faalauiloa lelei ai le tautua fou a le susuga Tala Pauga, lana CD fou lea ua faatauina nei i tua e 10 pese o loo iai, faatasi ai ma lana MTV, o se uluai taimi lenei ua faatino ai lea tautua e ala atu i le MTV.
O le a faafiafia le Folasi Band i le faagasologa atoa o le polokalame o lea afiafi; peitai e pepese ai foi ma nisi o tamafanau a Samoa ua lē o toe tau isoina o latou suafa i lenei lava taleni o le pese, suafa e pei o Seiuli Umalau, Joe Failua, Mr Gago, ma se tasi o alii pese e malaga mai Samoa, le susuga Sanele Atonio, o le a faato‘ā silasila ai ma faafofoga le mamalu o Samoa i Aotearoa nei i lona siufofoga mālie. O le susuga Sanele e mai afioaga o Leauvaa, Manono, ma Faleaseela i Lefaga.
E faafiafia foi i lea afiafi le susuga ia Lenni Ropati Mamea i lana siva ailao naifi e pei ona ta‘uta‘ua ai lea foi alo o le atunuu i le tele o faafiafiaga i Aotearoa nei. O le isi itu manaia i lea lava afiafi, auā o le po foi lea o le a amata ai ona tapena atu nisi o vaega e pei o ata, ina ia faaaofia i le MTV lona lua a le alii pese e pei ona fuafua i ai.
O le Theme poo le ‘Au‘au o lea afiafi o le ‘Aloa’ a alii ma le ‘Puletasi’ a tamaitai. E lua faailoga o le a saunia, o le faailoga mo le tamaitai o le a sili ona matagofie lana Puletasi, ma le faailoga mo le alii o le a sili foi ona matagofie lona Aloa i lea afiafi.
O le isi faamanuiaga mo i latou uma e maua se avanoa e auai atu ai i le faamoemoe i lea afiafi, auā o lea o le a faatauina i se tau taugofie CDs o Volumes uma lava a le alii pese; e taugofie ai foi ma le tau o le MTV; manatua e mo na o le afiafi lava lena e maua ai nei tau pa‘ū. E pei ona silafia e le mamalu o le atunuu, aemaise i latou o loo fiafia e faafofoga i musika i luga o le Radio Samoa, o se tasi o fatuga a le susuga ia Tala Pauga lea o loo saofai pea mo le tele o vaiaso sosoo, i le tulaga muamua mai le faatulagaga o pese e tolu pito i luga poo le Top 3, a le polokalame a le Radio Samoa, mo pese e sili ona fiafia i ai le aufaafofoga i lenei foi vaitau. O le CD tonu lea ua faaigoaina, “E lē tauto faalua Tama Fagaloa” o le a tatala aloaia ai i lea afiafi, o le CD foi lea o loo iai pese a Pauga ua lauiloa nei.
O le susuga ia Sau Siufanua e lē o se suafa e fou i lenei taleni o le pese, e pei ona sa lauiloa foi i le latou CD o le Maa o le Tanifa mai Fusi Safata. Ma o loo iai foi nisi o a latou fatuga i le MTV o le a faaali ai i lea afiafi.
E ese mai la i le show lenei o le a faia i Aukilani, ae ua fuafua foi le isi show e faia i le laumua i Ueligitone i le aso 27 o Oketopa, ona toe sauni lea mo lana show i Melepone, lea na lei mafai ona faataunuu i le lua masina talu ai, ona o nisi o mafuaaga faanoanoa e pei ona muai ta‘ua. Ae ua faatulaga ai nei le aso 3 o Novema e faataunuu ai.
