Na ala usu le toatele mai le tele o fuafuaga o le amataga o le Aso Toonai i Manukau i le TelstraClear Centre, e molimauina le faaaliga o auaunaga a Pisinisi Pasefika o loo i Niu Sila, ma o le toatele o nei auaunaga o loo pulea ma vaaia e tagata Pasefika lava latou i soo se auaunaga, e aafia ai atina‘e mo le manuia lautele.
Masalo o le uluai avanoa lea ua faatinoina ai lenei faamoemoe mo Manukau lava latou i le maitau atu. Vaaia i lea aso le tele o auaunaga sa tele ina faafofoga i ai i le Leitio ma televise ae ua tāua lea Expo e avea ma auala e vaaitino ai ma feiloai ai ma ia auaunaga tāua.
O meataulima o oloa gaosi i Niu Sila, o faasinomaga o fesoasoani, faatasi ai ma faalauiloaga o le tele o auaunaga, e manatu o se avanoa lelei tele lea mo le silafia e nai o tatou tagata Pasefika i Aotearoa.
Sa auai atu foi i ai nisi o le aufaipolokiki, e pei ona iai le taitai o le vaega faaupufai a le New Zealand First, Hon Winston Peters, le afioga i le tamaitai faipule o lea lava vaega faaupufai, Leaufaamulia Asenati Lole Taylor, ma nisi o sui lagolago o lea lava vaega.
Faapea foi se sui faipule o le National, o se tasi o tagatānuu Initia. O se itu matagofie lea i le vaai o nei sui o le Palemene, o loo latou faatāua auaunaga ma taumafaiga a tagata Pasefika i totonu o le atunuu.
E tele faafiafiaga sa faia, sa faatau ai foi i le pito mai i fafo le felanulanuai o taumafa a le Pasefika ma taumafa lava e tele ina fiafia i ai tagata i taimi faapea. O pepa o faalauiloaga mai auaunaga eseese sa faapea ona faatasia ai i lea aso atofaina mo le Pacific Expo 2012.
Sa faatasi atu foi i ai le auaunaga a le Samoa Multimedia Ltd o loo pulea le auaunaga a le Nusipepa o le Samoa Times faatasi ai ma le Radio Samoa i faasalalauga i totonu o Aotearoa ma o loo mafai foi ona maua i luga o le upega tafailagi www.radiosamoa.co.nz o loo mafai ona iai uma iina faasinomaga o auaunaga uma faatasi ai ma sooatulau ma isi auaunaga.
O se aso matagofie tele, ae iai le talitonuga o le toatele e lei lava lelei se taimi e faalauiloa lelei ai i le Pasefika atoa, atonu o le mafuaaga lea sa lei matuā vaaia ai se tumutumu e pei ona iai aso faapea; o le isi foi itu ona sa faaletonu le tulaga o le tau, ae faafetai foi i le Radio Samoa ma lana auaunaga auā e pei lava o le toatele o i latou na molimauina lea faalauiloaga o nai o tatou tagata Samoa ma latou na maua ai isi faalauiloaga mai isi auaunaga i lea Aso.
E iai le faamoemoe ia talosia ina ia sili atu foi se isi vaaiga i lenei faamoemoe i le tausaga fou ma faatāuaina e le toatele o tatou tagata Pasefika i lenei atunuu o Aotearoa Niu Sila, o se avanoa lelei e faalauiloa ai le tamaoaoiga o loo iai i oloa gaosi a le Pasefika, aemaise foi o auaunaga fesoasoani o loo latou taulamua ai.
